اكتئاب

اكتئاب

طبقات من النكد طـَبـَقِت على أنفاسى ..
قلبت كيانى ما عارف رجلى من راسى ..
لفيت على الحُكما : دا نفسى و دا أعصاب ..
دمرحياتى الإكتئاب و الصداع راكب على راسى ..
يا اسيادنا يا حكما :
بدن البعيد منكوى و منصاب فى قلبى و ف نفسى ..
القهر بدد صحتى .. ملعون و ظالم ، مفترى ، يقسى ..
مدد على الشيزلونج ، قال لى ، و خد نفسك ،على راحتك ..
فضفض و قوللى ، فضفضت له و وصفت له حسى ..
----------------------
فضفضت أحكى عن طابور الخبز
يا دى المهانة – و التموين ..
و الغلا اللى ضرب حياتنا ،
م اللحمة و الخضار حتى الصابون ..
اللى كان السبب ، يا رب اقطم رقبته و ضهره ،
قولوا معايا :
يا صاحب القدرة يا ربنا القادر .. آآآآآآآمين

بواب العمارة تبعنا اللى بفضل المولى بيحرسنى ..
واقف و دمعه على خده
حاطط لسانه الباكى فى ودنى ..
قدمت لابنى فى مدرسة
قال لى المدير بكام يا أخ تتبرع ..
من فين ؟ .. خدنى لسوق النخاسة
دلل عليا يا باشا و روح بعنى .

فى القطر اللى جاى م الصعيد : مريت على العياط
رجة فظيعة ، و الكل هاج ، و الكل زاط
قطرين فى بعض : إتكسروا ، جثث و ضحايا
هيصا و صراخ ، و بكا و عياط