يحمور فى السيما

(يحمور فى السيما (1

حمارى العزيز قال لى يا بو الدراويش ..
تعالى الليلادى ، نتفسح على الكورنيش ..
أنا قلت له فاكر يا حُمار لما اشتريتك نوفى ..(2)
رحنا نتفسح قبض علينا شرطجى : شاويش ؟
قال لى بلاش الفسحة ، أنا نفسى أروح السيما ..
عايز أشوف حكاية حلوة يكون عليها القيمة ..
أنا قلت له أجيب لك شريط فيديو و بلاها زحام ..
وانزّل لحضرتك من على النت آخر الأفلام ..
قال لى أنا نفسى أروح و اندمج فى القعدة مع الجماهير ..
و اقعد أبصبص ع المزز ، دانا عقلى خلاص ح يطير..
مليت خلاص أنا من النسوان دول اللى من صنف الحمير ..
قلت له يا حُمار البين : تبصبص ؟ .. انت نسيت أصلك ؟
ليه بننسى أصلنا ؟ .. آه يانا آه منك ؟
دا انت أصلك حُمار و همه ( كلاس ) و ذوات ..
قال لى مانا أرستقراطى و عيلتى كويسة وذوات !! (3)
قلت له يا بن الحمار إمشى على زريبتك ما تدلعشى ..
قال لى ما تشتمنيشي لارفسك و أكسحك ما تقدربعدها تمشى ..
قلت له يا حمارى الحبيب عفوا .. خلاص يا صاحبى ما تزعلشى ..

مافيشي فايدة م المناكفة ، أخدت يحمورى على السيما ..
بيمَنى نفسه بسهرة ممتدة للصباح حلوة و عظيمة ..
ماشى الحمار و حاطط حافره فى دراعى ..
و الناس متجمعين يسألوا ؟ .. أقول لهم يحمور دا ملكى و بتاعى ..
و هوه مش همه اندهاش البشر ، و لا وضعى بيراعى ..
ـ ما كنا استكنينا فى دارنا ياحُمار مفيش للهيصة دى داعى ..

ع السيما رحنا و قطعنا التذاكر .. دخلنا ع البلكون ..
ما بين نأورة و شتايم: إيه ده اللى جايبه يا مجنون ..

الحفلة خلصت أخدنى الحمار و حط دراعى فى إيده ..
* مستواكم منحدر فى الفيلم يا صاحبى : لا قصة و لا تمثيل ..
لا فكرة فيها و كمان ممثلين دمهم غلس و تقيل ..
طيب دا أحمر حمار عندنا يخرج لكم سِيد ِِسيده ..
و الا الولد دا اللى بيغنى و يرقص زى فرقع لوز ..
صدقنى افتكرته قرد شمبانزى ماسك سباطة موز ..

تعالى و اسمع عندنا طرب أبدا ما تسمع فى حياتك زيه ..
لا تقوللى سيكا وْ بياتى وْ صبا ، و لا طقاطيق و لا أدوار..
راح أسمعك حمورة : نهيقها شامل جواب و قرار ..
أروع كتير من صباح و وردة و أسمهان ، و حتى ليلى مرار..
مراد دا يبقى اسمها ... افهم بقى يا حمار .
--------------------------
(1) يحمور : اسم الحمار بتاعى
(2) نوفى : جديد
(3) ذوات أربع
4 مارس 2008