صباح الأمل

صباح الأمل

الشفايف بتنطق بالهوى و الحب
و القلب مليان بنور الرب
صباحك عسل يازهرة الأزهار
مليان أمل فى الله مشع بالأنوار
و احوط عليكى أحميكى م الأشرار
و اوصلك من فين ما إنت لحد باب الدار
دارك دى قلبى و عقلى ما بين الحب و الأفكار.
9 نوفمبر 2009

صباح البلبل

وقف على شباكك البلبل
عايز يصبح لكنه مش عارف
إيش يقول ، و إيشى يعمل
غنى و ساب لك على طرف فستانك
بوسة و غنوة و زقزقة غناها عشانك
تسمعى ؟ و الا مش فاضية
خايف يا جميله تطنشيه أو يُهمل
ساعتها يموت ، يغور فى ستين داهيه
ردى الصباح و لو حتى بعيونك الساهية
10 نوفمبر 2009


صباح التفاح

صباح الأمل المشرق فى عينيك
صباح التفاحة المشقوقة على خديك
صباح الوردة المرسومة على شفتيك
صباح الجمال لبدر جميل
نوفمبر 2009

صباح الورد

صباح الورد يا جودو
و صحبة ورد فى خدودو
و وردة حمرا فى شفايفه
جمال البدر أنا شايفه
على وشه ، و كمان عوده
كما المانيكان بجسمه و قدوده
صباح الفل يا نرجس
وفى ودنك أقولها لك
على البرقوق أقولها لك
على التفاح أقولها لك
أنا وحدى أقولها لك
أنا لوحدى ، أنا و بس .
10 نوفمبر 2009

صباحك صافى

صباحك يا جميل صافى
و نظرة عينك تجننى
و أسأل إمتى ح توافى
دا عقلى الواعى تاه منى
طب ابعت حتى و لو كلمة
تطفى النار ، تطمننى
صباحك وردة لون أحمر
على شفتيك
!!أدوقهم ، طعمهم أخطرمن البفتيك
صباحك خوخة لون وردى
على خديك
تقولى طب و فين قدى
أقول لك دا صاح الديك
و عنده لسانى راح يخرس
يصونك ربنا و يحرس
يبارك ربنا و يحميك
10 نوفمبر 2009

صباح العندليب

العندليب
فى الصبح غنى للحبيب
مرضان و مش لاقى الدوا
و هجرنى الممرض و الطبيب
قالوا علاجك مش هنا
و دواك ماهواش عندنا
ياللى أضناه الهوى
لا طب ينفع أو دوا
دا بسى نظرة م الحبيب
12 نوفمبر 2009

صباح الفـل

صباح الفل و السكر
صباحك نادى و معطر
و صحبة ورد تتمخطر
على خدودك
يا قلبى ، ربنا يزيدك
و وردة حمرا و شقية
على الشفتين بتتبسم
تلونهم و ترسمهم
و نحلة طيبة كبت
عليهم عسل أبيض
و انا واقف و كان نفسى…
زعلتى ؟
طيب خلاص إنسى .
16 نوفمبر 2009

صباح قطقوطة

صباح قطقوطة سيامية
منور مية على مية
أخدها فى حضنى ، أخد إيدها
و ادلعها ، وأهدهدها
فى وقت الزنقة تلقانى
دراعها الأيمن و ساعدها
ما فيش زيى صديق تانى
21 نوفمبر 2009




صباح العسل

صباح العسل و الورد المزهزه فوق شفايفك
على فكرة : أنا شايفك
الطرحة بيضا و فستان أبيض سواريه
إيه هيه الحكاية يا عمنا ؟ .. فيه إيه ؟
قالوا القمر و الشمس كتبوا كتابهم و راح يقعدوا فى الكوشة
شوف الجمال و القمر المنور و الزهور متستفة و مفروشة
حلاوتِك مغطيـّة الكرة الأرضية
عاشق و جلاشة و بسبوسة
معذور ..
جذبه شعاع من نور
من نورك و من حسنك و من ظرفك
إيه يا بدر، مكسوفة ؟
ليه ؟ دا انت القمر و الكل شاهد و انا عارفك
22 نوفمبر 2009