أنا المصرى

أنا المصرى

إياك تقوللى إحنا كنا

عايزك تقوللى إحنا إحنا ..

إوعى تقول نارمر و ّخفرع و الا ّخوفو ..

و الا رمسيس اللى العدو مات فى جلده من خوفه ..

صدعت راسى بالهلاوس والكلام ..

أَسمع قوالة حضرتك : الله عليك ، يا سلام ..

و اشوف أمورك : إخّيه عليك ، بقى دا كلام ؟

عَمّال تقول الحب عشش جوه قلبى ..

هيه مصر مفيش سواها ، هيه حبى ..

ُبقين كلام ، حبة غُنا ، هيه عنه فى غنى ..

سر القلوب دا شئ يعلمشى بيه غير ربنا .

بتقوللى مصرى ، أكرم يا سيدى بيك و أنعم ..

فين العمل ؟ أصل العمل بيه بنعلا و بيه بننعم ..

يا مصرى قلل من كلامك ، الجد فينه يا عزيزى ..

فى السوق ما تلقى إلا صينى أو يابانى أو ماليزى ..

حبة كور هايفة ، متاعة بنج بونج ..

صنعت فى تايوان أو صناعة هونج كونج ..

أبحث وادعبس عن شعار : " مصنوع فى مصر " ..

منتجات من كل ملة مليا سوقنا ، مالهاشى حصر ..

مستهلكين إحنا و مالنا فى الحضارة أى دور..

حاجة ما ترضى أى مخلص للبلد وطنى غيور .

فين العقول المبدعة فى كل عصر ..

فين من حققوا ف 6 أكتوبر أغلى نصر ..

فين السواعد ، فين الضماير ، فين القلوب الحامية و الإخلاص ؟

الجهل سايد ، و الفقر زايد ، و الكل عايش عيشة و خلاص ..

ما بقاشى غير حبة قرود يتنططوا فوق الشاشات ..

و اللى مبحلق فى الكمبيوتر طول النهار يعمللى شات ..

و اللى ورا كورة بيلعب هوه و الكابتن : خد و هات ..

يا مصرى يا ابن الأكرمين عود لعقلك ..

دى البلد عايزة صبرك ، عايزة جهدك ، عايزة عملك ..

اخلص لها ، تلقى الثواب فى أرضها ، أوعند ربك .

مصطفى سلام

أول فبراير 2008