حاجة تجنن !

ح اشد فى شعرى و إوعوا حد يمنعنى ..

أنا رحت بنك كبير .. فى العظمة إيه يعنى ..

و قلت فلوسى أحطها فيه : يحفظها , ينميها ..

و آهو قرشى بيكبر فيه و ف يوم : حينفعنى .

حطوا لى مكنة , أحط فلوسى و اسحبها ..

فى الحط زى القرد .. فى السحب : عفاريت بتركبها..

عطلانة دايما تقوللى خارج الخدمة ..

أمشى كسير القلب ألعن أبوها و أسيبها .

فكرت يوم و رحت أبعت لليتامى شىْ ..

حاجة تكون لى .. فى يوم القيامة ضىْ ..

قعدت يا محترم استنى فى دورى ..

فى البنك ضاع النهار منى .. خيبة مالها زىْ .

يا مصر بادعى ربنا ع الغـُـلب دا يعينك ..

يهدى ولادك و يرفع للسما جبينك ..

حالك ما يرضى عدو كارهك أو حبيب ..

يوصل ما بين ولادك ربنا و بينك .

مصطفى سلام

17 مارس 2007

حا يا حمار

حا يا حمار

(مناقشة مع حمار)

نهّــق صديقى ف يوم نهيقة ..

قال دا قلبى فيه حريقة ..

من زمان غادر ما سابشى ..

من ركب راكب و لا اللى ..

ع القدم ساير يسير .

نهـّق صديقى ف يوم و قال ..

ميت ندامة ع الزمان ..

فسد الضمير و الوضع مال ..

مبقاشى فى الدنيا أمان .

نهّـق حمارى ف يوم و قاللى ..

ليه انت يا صاحبى تمللى ..

نازل كلام مليان و فاضى ..

إوعى تكون فاكر كلامك ..

راح يغير فى الأمور .

طب خد يا صاحبى منى عبرة ..

حتقول حمار ؟ ... لكنى خبرة ..

حاطط لسانى جوه خشمى ..

راح تلاقى ضهرى كله ...

مليان جروح تؤلم بتدمى ..

رغم ده .. شايل و ساكت ..

آهين يا قلبى يا كتاكت ..

باشتغل طول النهار ..

علشان عودين برسيم و فول ..

يترموا لى فى الطوالة .. (1)

ولا فيشى شفقة و لا قوالة ..

و لا حتى خد كل يا حمار ..

بالليل زريبة تلم عضمى ..(2)

أتخمد فيها و انام ..

و آهى أى نومة و السلام .

انتوا بتشكوا م البطالة ..

و احنا من نقص العمالة ..

عندكم سكان كتير ..

و احنا نقص من الحمير.

و عشان كده نازلين علينا :

طاخ و طيخ ، حا يا حمار ..

طيب يا صاحبى خد قرار..

ليه بس راضى تكون حمار ..

لو كنت تجمع يوم حميرك ..

ثورة و اضراب و اعتصام ..

رفص و نهيق ، وخطب .. كلام ..

مش راح يلاقوا حد غيرك ..

يركبوا .. يشدوا اللجام .

شكلوا لجنة حميرى ..

الأمرده قطعا ضرورى ..

حتى تدافع عن حقوقكم ..

كلموا السيد كى مون ..(3)

يبعت لجان تدرس أراءكم ..

و اعملوا ع النت موقع ..

فيه المخاوف و الظنون ..

و المطالب و الشكاوى ..

و ان كنت فعلا انت ناوى :

سيد قراره فى بلدنا ..

روحوه ح تلقوا الكل غاوى ..

يسمع ، يوافق ع الحلول ..

من غير مناقشة و لا قوالة ..

راح ينصفوكم يا حبيبنا ..

أصلهم من غير مؤاخذة ..

فطروا كمثلك عيش و فول .

---------------------------

(1) طقم السيرفيس اللى يقدم فيه الطعام للبهايم .

(2) الزريبة هى الـ Bed Room الخاصة بالبهايم

(3) أمين عام الأمم المتحدة

17 مايو 2007

ح أطق

ح أطق

نظرا لأنى م الفقارى المطحونين ⁽¹⁾..

لا ليا حزب يلمنى أو جماعة أوهَجَص ..

لكنى مواطن م اللى شايفه فى بلاد الغلبانين ..

مقهور و باغلى ، راح افرقع ، راح اطق و أنفرََس ..

الناس بتاكل بعضها ..

إيه تانى شئ ممكن تعمله ..

دى " النارُ تأكلُ بعضَها ..

إن لم تجد ما تأكلـُه " ..

مش مسألة ممعيش فلوس ..

دى المشكلة مش لاقى عيش ..

و يقولوا روح يللا انتخب مين جوّعك ..

و اهتف و قول : يحيا ، يعيش ..

رحت أنتخب مجلس محلى ..

كان منظرى آخر عجب ..

واقف محلى ، أعد كام فرد انتخب ⁽²⁾ ..

ساعتين ، تلاتة ، و لا الهوا هوب علينا ..

و دا عهدنا فى الانتخاب من عهد مينا ⁽³⁾..

و المسئولين مش مكسوفين ، و لا فيشى دم .. ^.

هيه صحيح زى اللى قال : مضحكات فى مصر لكن : ⁽⁴⁾

فى الحقيقة مبكيات ..

و اللى فات يا صاحبى مات ، المصيبة فى اللى آت .

ألف نيلة منيلة ، روح هات لنا لقمة ناكلها ..

ديمقراطية إيه يا عمى .. كده أو كده هوه واكلها .

-------------------

(1) الفقارى : الفقراء

(2) واقف محلى : واقف مكانى

(3) الملك مينا

(4) أبو الطيب المتنبى الذى قال : " و كم بمصر من المضحكات .. و لكنه ضحك كالبكا ".

9 أبريل 2008

جارى

الماء الجارى

المحرومين اللى الحكومة بسوء إدارتها ... : نسيتها ..

و اتهمشوا بأفعالها و وقعوا من قعر قفتها ..

الماء اللى بيشربوه : يا وسخ ، يا نَظيف :

إن كان َنظيف : فلا دايم و لا جارى ..

و ان كان وسخ : فـ : ميّـــة برك و مجارى ..

و الدولة نايمة و المحافظ ما هوش فاضى و لا دارى ..

أدعى عليكى يا حكومة ، يجيلك فشل كلوى ..

أو حتى فيروس ما تلقيله علاج كيماوى أو نووى ..

ح اكنس عليكى السيدة و ابتهل هناك و أصلى ..

يجيلك فى كبدك ، فى قلبك يجيب أجلك و تتكلى ..

17 يوليو 2007

ثرثرة مع الذات

هوه ده أكبر عيوبى :

إنى بانسى ..

إيه أكلت الصبح ، فين علـّـقت توبى ..

و الزمان أصبح و أضحى و الا أمسى ..

كم جنيه جوه ف جيوبى ..

و حياة غلاوتك ماهى فارقة ..

ما انت بتخرج حاشى جيوبك ..

فى الليل بترجع فاضى مقشط ..

جبت إيه قوللى بسلامتك ..

عيش و جبنة ، علبة زبادى ؟

فيها معلقتين و تخلص ..

قبل حتى ما اقول يا هادى ..

مالك و مالى ؟

خلليك فى حالك .. سيبنى فى حالى ..

مبسوط ؟ .. يجوز ..

و الا معكنن ..

إيه فيها يهمك !!

ما هى ديـّــا , هيه الخلايق ..

مبسوط ، سعيد ، فايق و رايق ..

و المبتلى و الرزق ضيق ..

و يقول دا بكره ..

ربك ح يرزق ..

فرجه قريب ..

معطى مجيب ..

و آهى دنيا ماشية ..

ما يهمهاشى ..

إن كان كتابة و الا حسابة ..

إن كان غنى ، و الا غلابة ..

يللا بقى ، صدعت راسى ..

عايز أنام ..

كله تمام ..

رايح أعيش ..

فى دنيا تانية ..

مفيهاشى أزمة ..

ف دقيق و عيش ..

و حاجات كتيرة ..

مالهاشى لازمة ..

ح احلم بدنيا ..

حسب المزاج .

يولية 2008

تعظيم سلام

تعظيم سلام

تعظيم سلام لعبقرى بَرَت البرايا على إيده ..

علم و ثقافة و فن ، نِعم أنعم عليه بها سيده ..

يدخل عليه المريض فوق كتافه الهموم و البأس ..

يخرج مزقطط سليم يبوس الإيدين و الصحة عال العال ..

و لا عنده بعد الإيمان إلا الأمل ، لا قنوط و لا يأس .

لو قالوا مين العظيم فى الطب ، راح اقول لهم حاتم ..

أستاذ و حجة فى العلوم و الفكر و الأخلاق ..

خد منه مبادئ و أفكار عميقة ، أصله فيلسوف عالم ..

تلقاه يجرك فى المناقشة ، و يدخل ف تفسيرات آية ..

كإنه شعراوى جديد ظهر لنا ، دى حكايته دى حكاية .

أقول له يا تومى عمك وقع ، ألقاه جاى من بعيد يجرى ..

طيارة بوينج ، لا تقوللى أسبانى و لا توربينى و لا مجرى .

يا دينا ، ربنا سبحانه رزقك نبع فياض بالحياة دايم ..

حبيبنا و حبيب البشر كلهم – زينة الشباب حاتم ..

حافظى عليه و صونيه ، يرضى عنك ربنا يا ست هانم .

مصطفى سلام

23 يولية 2008

تشنيعة

تشنيعة

( رد على يحيى زكريا )

تشنيعة و أسية ..

يا يحيى بن زكريا ..

دا حسام دا كابتننا ..

زينة لفندية ..

و ف عيده ، كانت ليلة ..

صافية منديّة ..

و حضنته و هنينا ..

أنا ، و انت قبليا ..

و حبايبه محاوطينه ..

بحنان و حنية ..

و سَعِدنا بلمّـتنا ..

قول : ألف فى المية .

و صحيح حسام يعنى ..

زوّد لكن برضه ..

فى ليلته و على أرضه ..

كان (فِرْويد) و راس حربة ..

و خبط له كام خبطة ..

فى الضانى و التورطة ..

و الرز أبو خلطة ..

لكن دا كان حقه ..

كلٌ حسب بقه ..

و هنيا يا كابتنا ..

و ف مولدك القادم ..

نتجمع و نهتف لك ..

و نشيلك على راسنا ..

و نقول للجميل يحيى ..

صورك رائعة و صاحية ..

فلتحيا يا أخى العزيز يحيى .

مصطفى سلام

25 ديسمبر 2007

ترنيمة كروان

الملك لك لك لك

يا من مَـلــَك

كروان بصوته الجميل

شاقق سكون الليل

طاير يسبّـح بحمد مولاه الجليل

اللى خلق الزمان و الفـَـلك

تسبيحُه فى جوف الضلام ترنيمة من التراتيل

كإنه موسيقى بيعزفها بكل إبداعه مَـلــَك

بعد الجمال دا كله و ما أنزل من التنزيل

لسه فيه بشر فى قلبه المريض ذرة من شك ؟

19 مايو 2009

بقى لى حتة

بقى لى حتة

حاخد لى من مصر حتة

يكتبها يوسف بإسمى

بجنيه أو اتنين أو خمسة ستة

ح ارفع دماغى و اشد عزمى

يا حلاوتى راح أهبر لى هبرة

شركة أو مصنع ، أو بالقليل بقرة

اشمعنى انا ؟ واقع أنا من قعر قفة ؟

واكلينها لحم و راميين لى عضمة

نصبواعليها فرح و رقاصة و زفة

النية كانت بالمزاد

و البيع لأنجاس البشر

شاكك فى نواياهم والمراد

مين فى النهاية ح يمتلك

انت وانا .. و لا ّ كبار المستثمرين ؟

و الا مستثمر رئيسى .. جايلنا من تلْ أبيب ؟

هس ، ما ترفعش صوتك : يسمعك عدو ولا ّ ( حبيب ).

21 نوفمبر 2008

بطاقة التموين

بطاقة التموين

مصرى و أبوى مصرى و كل اللى مخلفيننى ..

و بطاقة رقم قومى معايا فى جيبى و لكنى ..

واحد و محسوب من الناس الميتين .

أصلى أنا عايش على أرضها من غير بطاقة للتموين .

العيش راح ينصرف بيها و الرز و الزيت .. و حتى البيض ..

راح تصرف بها السريس و الجزر و المش و الجعضيض ..

ممكن كمان يطلبوها و انت داخل على المراحيض ..

قولوا لى إيه العمل ؟ مش عارف أطلع بطاقة التموين .

.

8 مارس 2008

بطاقة التموين

بطاقة التموين

مصرى و أبوى مصرى و كل اللى مخلفيننى ..

و بطاقة رقم قومى معايا فى جيبى و لكنى ..

واحد و محسوب من الناس الميتين .

أصلى أنا عايش على أرضها من غير بطاقة للتموين .

العيش راح ينصرف بيها و الرز و الزيت .. و حتى البيض ..

راح تصرف بها السريس و الجزر و المش و الجعضيض

ممكن كمان يطلبوها و انت داخل على المراحيض ..

قولوا لى إيه العمل ؟ مش عارف أطلع بطاقة التموين .

.

8 مارس 2008

برضه مصرى

برضه مصرى

لولم أكن بالفعل مصرى ..

شايل بلادى ف ننى عينى ..

لوددت اكون و بشكل حصرى ..

نُصّى يابانى و نُصّى صينى ..

حزم وقيم ، إخلاص و همة ..

و العمل و العلم دينى ..

مذهبى وغايتى و قيمتى ..

أزهو بما صنعت يمينى ..

ما اقعدش اقول رزقى و قوتى ..

من غير عمل .. مقدور يجينى ..

أكتب تاريخ و اصنع حضارة ..

فى السما رافع جبينى ..

و لا اغنى طول ليلى و نهارى ..

عن مجد كان لينا .. و ولى ..

و لا حد سامع : ( بينك و بينى )..

و ارجع و اقول : دى مصر أمى ..

منها الحياة ، فيها الأمل ..

عقلى و جنونى ..

دقات ف قلبى ، ومضات فى روحى ..

هيه حياتى :

و لو اتلعبكت فيها شئونى .

11 أغسطس 2008

بتحبها ؟

بتحبها ؟

حلو الكلام ..

و تموت فى قصة شعرها ..

و تشيط غرام ..

عاجباك برنة كعبها ؟

فوق الرصيف ؟

و شياكة و رقة قدها ..

و الذوق لطيف ؟

دا الحب يا بنى شكل تانى

عازف بيعزف جوه قلبك ..

نغمة بتسرى فى الودان ..

و شعاع بيلمع ..

و ساعات ألم فى القلب يلسع ..

روح بتتسرب فى روحك ..

و يعششوا ف نفس الكيان ..

تلقاها روح واحدة بتبقى ..

واتنين يعيشوا بنبضها ..

..و يدوبوا سوا و بكل رقة

بتحب منظر ؟

و بتهوى مظهر ؟

و تقع صريع الهوى : ولا حد سمى , أو حد كـّبر ؟

دا البوصة راح تبقى عروسة ..

لو لبستها فستان جميل ..

و إن مكيجتها ْبمكياج نقيل ..

طب فين حلاوة عقلها ؟

إيه غيرها راح يفضل لها ؟

باب الحديد

صـور من الميدان

وقـْـفتنا هنا ف باب الحديد ..

كان هنا ف يوم قريّب ، رمز عالى للشموخ ..

تمثال بيحكى لنا أمجاد التاريخ ..

باب الحديد :

يورد عليه وارد جديد ..

كل لحظة ،

كل يوم يرحل مسافر أو يعود ..

جاى من بعيد ..

تيجى وفود ..

و تروح وفود ..

معرض ثرى لكل البشر –

اللى جاى من سينا ،

أو رايح الصعيد ..

جلابية بلدى أو ملس ..

أو منحشر فى بدلة جواها انحبس ..

و اللى بشبشب ، و اللى بجزمة ..

و اللى بطاقية ملهاشى لازمة ..

و النصابين و البياعين :

بيبيعوا أصناف من كل لون ..

شطار و واخدين شهادة نشالين ..

يسرقوا كحل الصبايا م العيون ..

إوعى لجيبك : زى ما قال ص. جاهين ..

يصطادوا أريافجية أو أهل الصعيد ..

يتنططوا فى الأتوبيسات :

ما تقولشى جبلاية قرود .

و الأتوبيسات و الميكروباس و التاكسجية ..

شبرا ، أو سوق العبور، جيزة ، فيصل ، عباسية ..

أصوات بتدوى فى الودان ..

آخر فظاعة ..

تسمع كلاكس ..

يخرم ودانك ، يركبك ألف بأس ..

حاسب ..

إوعك تعدى فى الميدان ..

أكبر مخاطرة ..

غير بنت حلوة .. عفريتة شاطرة ..

وقــّفت كل المرور ..

بجمال ماهوش على حد تانى ..

عيانة بمُرَكـّـب غرور ..

حقها !!..

لا تقوللى كانى ، و لا حتى مانى .

المترو من كوبرى الليمون ..

رايح على مصر الجديدة ..

الزحام خنقة و جنون ..

أعصاب ، توتر ، أزمات شديدة .

و اهى دى بلدنا الحلوة .. خنقة ..

محشورين فيها و زنقة ..

لكنها حبى وأمى و الحنان ..

من طينها جسمى و نيلها روحى ..

حودت على مطعم : ( جعان ) ..

و أكلت م الدهان كباب ..

و قعدت على قهوة سطوحى ..

و طلبت شاى أخضر منعنع ..

ورنيش يا باشا .. عايز تلمع ؟

يا باشا ..آخر حلاوة ..CD

تحب تسمع ؟

ساعات رخيصة باتنين جنيه ..

أقلام يا باشا ، أساتيك يا بيه ..

بسطا بعجوة حلوة و لذيذة ..

الناس يا عالم جرى لها إيه ؟

نازلة تفاصل : الل بجنيه ، يبقى ببريزة ..

و حاجات كتير ما لهاشى عوزة ..

العصر يدّن : الله أكبر ..

فى ولاد عنان ..

رُفـع الأذان ..

القطر صفر ..

هيصااا و هوجة ..

مليون و أكتر ..

كله يهرول ..

كام ألف موجة ..

اللي مجبل ، و اللى مبحر ..

سكة سلامة ..

و المولى يستر .

14 أغسطس 2008