!! عايز أكون إيه ؟

اتعلقت روحى فى السما بسحابة

هِرْبتْ من الدنيا و مُرِّها وأصوت الديابة

دابت فى بخارها وسارت معاها فى السما
نزلت على صخرأملس رخاخى من مطر
نبـتت ما بين الزلط نبتة وردية
مكتوب على أوراقها : إيه الحلاوة ديـّـه ؟

عَمَـلت من الضباب توب يخبيها
ضِحكتْ و فاكرة إن توبها راح يداريها
نزلت ندى فى الصحارى .. رملها اتبسم
حضن بعضه من الفرحة , نطق بالحكمة و اتكلم
دى الأرض أصلك يا جدع مش مكانك فى السما
امشى فى مناكبها و عمّـرها , وخد منها و اتعلم

قالت أكون شجرة , دا الشجر أخضر عظيم عالى
عليه الطيور بتلعب و بتقول للدنيا وانا مالى
تتعدلى , تتعوجى .. أنا ف دنياى بتهنَّى
خضرة و هوا .. و تكال على المولى , ومنصلح حالى

جالى ولد صايع و بالطوب ضرب راسى
عايز له حبة ثمر سرقة و لم يرعى إحساسى
و جات لى بنت و ولد قال إيه ؟ بيحبوا بعضيهم
حفروا القلوب و سهام على جذعى و على ساسى
سالت دمايا على جذعى , بين ضحكهم و مرحهم
عجبى
أنا م الألم أبكى , و همه... هيصة ف فرحهم

طيب أكون عصفور .. مغرم بالغنا و الرقص
فوق فى الفضا بأطير.. هايص فى المرح و الأنس
مطرح ما يهنا لى المقام .. ابنى لنفسى عش
عصفور بسيط أنا مش زيكم يا بشر.. عندى مليون وش
قالوا يا مسكين : غـّرك مننا المرح و الغنا و الهيصة
شُـفنا , و بومة بتلتهمنا .. لحمة لذيذة ف طعمها و رخيصة
و لا ّ ولد عفريت : بنبلته و بطوبة يضربنا
(مازوكى بيتمتع وبينفـس عن كبته ويقتلنا .. (1

ماشى .. أكون نسر أو صقر الفضا العالى مكانى
قوة و بأس و تعالى ِ, و الكل يخشانى
و اتحط رتبة على كـْـتاف السادة و ألعلع
رائد , لوا أو فريق .. فوق كتفه أتدلع
و لا ّ اترسم وسط العلم فى العالى بنرفرف
أو على الختم الشهير منظره فوق الورق .. يقرف

شوف بقى .. قررت أكون فى البحر سمكة قرش
(نازل أفرتك فى السمك و البشر و أحش .. (2
يا ويله ساعتها اللى يطوله و يقفشه فكى
راح اقطعه ميت حتة , لا يصرخ و لا يبكى
رعب و فزع فى البحار و يصوروا لى فيلم
لأ لأ .. دى شريرة و انا بطبعى أميل للسلم

طيب أكون إيه ؟ من فضلكم قولوا لى ؟
عايز أكون كائن : الحياة و الدنيا يحلوا لى ؟
باين مفيش أجمل من أن أكون إنسان
الكل اعتذرعن حمل الأمانة و حملتها لوحدى
كرمنى إلهى على كل الخلايق , و الملايكة كمان

أنا مش ح اكون إلا أنا .. مهما تكون أطماعى
إن عشت راضى .. الكون ح يصبح ملكى و مْـتاعى
راضى يا ربى بقسمتى .. دا العدل دا حكمتك
اهدى لى نفسى يا خالقى , يا إلهى بقدرتك

---------------------------------------------

مازوكى مريض بالمازوكية : التلذذ من إيذء الغير(1
(2) أحش : آكل بنهم شديد

مفيش حظ

(1)

فى الحارة

المشهد الأول

منديلها ابو أوية

دلوعة بيتعاجب

و يدلع الحاجب

رائع و متدندش

بيقول لها هاتى

من القورة كام حتة

جرتنى وياها

اتمنى فى رضاها

الحسن دا يهوس

حاجة كده بتروش

المشهد الثانى

على قدها مالت

غمزت لى بعنيها

اسمعنى يا إنت

عاشق لمنديلى

و تقوللى تعاليلى

طب بص لملايتى

نازلة على كتفى

و مغطيا سدرى

ملفوفة فوق خصرى

حتقوللى يا وعدى

يا لهوى يا حومتى

لو ترضى يا سعدى

المشهد الثالث

الحلو فى البلدى

فى الذوق و فى الملبس

و حديت لذيذ بلدى

حاجة صحيح تهوس

و الخطوة فى البلدى

رقصة بتـدّرّس

بتدب بكعوبها

مزيكة يا عينى

الودن تسمعها

معزوفة بتشجينى

لو شفت هزتها

مكياجها ربانى

دى نفسها زينة

أو عطرها البلدى

بيرّقص المناخير

حاسب على نفسك

لا تروح بدون تأخير

روحى أنا ف بلدى

و جمال بنات بلدى

عقلى ما عاد عندى

سحرُه الهوى البلدى

المشهد الرابع

حوّدت على قهوة

جا لى ولد جرسون

شكله كده ملعون

" فنجان معاه شيشة "

" عمرانة بحشيشة " ؟-

" لا يا ولد حاشا "-

" ليه بسّى يا باشا ؟ -

تلقى المزاج بيها

ملعونة بلاويها

"الدنيا و ما فيها

يا ابنى أنا سكران" -

كاسى و كان مليان

فضّيتـه فى قلبى

"أصل الهوى فاض بى

المشهد الخامس

" البنت بلطيـة ؟؟؟؟؟؟؟؟؟؟؟؟ -

!!يا نهار أبوك اسود

" ليه يعنى .. إيه هيـّه ؟ -

" امشى و لا تحـّود -

ما تروحشى فى داهية

دى بنت ابو كرشة

جبار و لا بيرحم

أخلاقه كتير وحشة

ينزل على دماغك

يفلقها بالشومة

و تنط فى كرشك

سكينة أو مطوة

يللا قوام امشى

لا شيشة و لا قهوة

".لا يطب على سهوة

المشهد السادس

و خرجت م الحارة

بالحسرة يا خسارة

مليان كتير بالغم

مالي انا يا عم

و بلاها بلطية

ابعد تكون أسلم

دوّر على غيرها

أسماك كتير فى اليم

(2)

الزمالكاوية

المشهد الأول

(و طلعت أنا م الحارة و تركت بلطية .. (1

(ماهوش ضرورى السمك يا هوى .. عايز أنا بنية .. (2

طب روح لجاردن سيتى , تلقاها , أو فى الزمالك

ومشيت على قدمى كسير القلب متهالك

المشهد الثانى

أهى هيـّه ديّـه خلاص يا قلبى و لقيتها

حتة حلاوة مسكرة , من راسها لكعب جزمتها

قابلتها صدفة ف طريقى فى الزمالك

اللى يقع فى هواها , من غير كلام هالك

أهى هيه ديه اللى فيها الوعد و المكتوب

تدينى نظرة رضا , أهمد بعدها و أتوب

المشهد الثالث

لفيت وراها فى الطريق كام لفة

بونجور يا بيضا ياللى كلك خفة

:لحظة صفا يا مزمزيل , قالت لى بعيون ساهية

خايفة على قلبك يا غالى يروح , فى خمسميت داهية

قلت لها دا راح و انتهى , من وقت ما شاف حسنك

(كلمة وحيدة - ترجعه - من بين مباسم سنك .. (3

المشهد الرابع

شوفتوش يا عالم قمر, راكب على وش إنسانة ؟

لما تبان , تلقوا النجوم , مكسوفة و دبلانة

حلاوته فستانها , ناطق بكل لون فى الطيف

قمة تناسق : قدها : آخر شياكة نحيف

أزرق و أحمر و أخضر .. حاجة فى غاية الذوق

الجسم من فرحته بيه , لازق و فيه مزنوق

من باريس الآنسة شارياه من بيير كارادان

حتى الإكسسوارات , جايباهم من فرنسا كمان

المشهد الخامس

شوف الضوافر و طولها , مدهونة بالمونيكير

و لا ّ العيون اللى بتقـتل و الرمش سهم خطير

و الشعر متسبسب و سايح تقولشى حرير

خـُصلة و نازلة على عينيها .. منظر بجد خطير

و لا ّ الحواجب : قوسين يحرسوا لها عينيها

بارفانها هفهاف و مالى الفضا حواليها

شوفوا الشفايف : كرزة مخلـّـطة بفراولة

لا تقوللى زهر و ورود – دول يا صديقى أحلى

!!عينى يا وعدى على جزمتها .. كعبها كام سنتى

ماشية تدقدق و تحفر فى طريق أسمنتى

شايلة على صدرها حبيب قلبها لولو

شرياه بوزنه دهب .. الناس كده بيقولوا

و القلب ماشى وراها بيرقص : يا حلوة له بصى

طب جملة واحدة قوليها .. طب كلمتين بسى

غيرك طلبها و انتحر من أول البصة

الرمش زوّد عليه الدلال و الدلع و اتوصى

روح قبلا خد لك فى الهوى كام حصة

(بصت له بصة , عينى عليه .. سورق .. (4

اتجمعوا الناس , صبوا عليه كام دورق

:فاق بعد حين .. كانت بتتفرج

على قتيل كسير القلب متشنج

المشهد السادس

مرت فى طريقها الجميلة على مول

وراها يا جدع اوعى تتوه منك

و دخلت ف أترها أنا على طول

حاجة ذواتى و راقية و شكله رهيب و مهول

خلاصة القول .. تايه أنا و محتار

أصناف من الجبنة اشترتها و جنبها كافيار

و ازازة من المنكر , و بعض الطعام للكلب

أما أنا : هات لى يا مسيو , علبة سفن أب

و وقفت ساعة على قدمى و الركب باظت

جميل الشوك على قلبى مادام الورد يتحب

و عشان تحب الورد , لازم ينسقى العليق

تستحمل دلال الصبايا بدون ملل أو ضيق

إيه الدلال و الدلع دا اللى الجميلة بيه خارجة

نجمة و ساطعة ملعلعة .. مالى ضياها المول

لا نافع فى وصفها زجل أو شعر , أو بديع القول

المشهد السا بع

رنة على المحمول .. قوام (جوّها) جالها

عربية مرسيدس عيون ياهوو على جمالها

حتة ولد تافه مزركش قميصه .. حضرته سايق

يمضغ لبانة و دلوعة والدته و عايق

"هاللو حبيبى الغالى " .. "هاى كوكى "..

!!راجل يا حلوة جدع .. اسمه يكون كوكى ؟

(سقطت من نظرى يا حلوة : ملعون أبوه و ابوكى (5

المشهد الثامن

لقيتنى مش قدها , و لا هيـّه من توبى

يا نفسى سيبك من شيطانك و استغفرى و توبى

عينى على قلبى اللى هايم فى هوى الغزلان

اهدا يا قلبى و اصطبر .. دا كل شئ بأوان

بس انت تهدا و تهمد , و لا تزعل على اللى راح

و اندم على ذنبك و توب و اطلب من المولى مغفرة وسماح

المشهد التاسع

فينك يا بلطية يا مجدع يا ست الكل

أخلاق و قيمة و سيمة و زى الفل

المشهد العاشر

يعنى ما طـُلـْـتش فى هوايا البت بلطية

(و لا زيزى اللى عاملة نفسها عصرية . (6

بطلت يا صاحبى العوج , طلقت انا شيطانى

!!!استنى يا جدع

بص الحليوة اللى ماشية هناك ؟

!!آه منها آه يا قلبى آه يانى

!!تعالى نشوف حظنا .... يمكن يتعدل تانى

----------------------------------
(1)( بنت المعلم أبو كرشة المذكور فى قصيدتى ( فى الحارة
(2) بنية = حمامة
(3) مباسم سنك = ثغرك المبتسم
(4) سورق = أغمى عليه
(5) مش أنا اللى قلت الكلمة دى . دا الشيطان
(6) زيزى = دا اسم البنية بتاعة الزمالك .
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مصطفى درويش سلام

يا قلبى

يا قلبى

عصفور مزقطط فوق الشجر بيغنى

ألحان ما غنى زيها قبله بشر أو جنى

سألته مين إنت يا عصفور يا ساحر قلبى و عنيا

:قال لى ما تعرفشى يا صاحبى العزيز إنى
أنا قلبك

لقيتك يا حبيبى مكتئب ومن الحياة يائس

وشك مكشر ممتعض و على الدوام عابس

أنا قلت أسليك بحبة أغانى حلوة و شجية

يمكن تزيل الهم اللى على نفوخك كابس
و انا صاحبك

شوف يا صديقى العزيز , بص الحياة قد إيه حلوة

ياه ع الجمال و الصفا .. دى كلها على بعضها غنوة

تلقى الحياة بتناديك .. تعالى هيا إليا

فتح عينيك للجمال و اجلى البصرمن أجلها ميت جلوة
و انا جنبك

شوف يا صاحبى العصافير كلها ع الشجر بتشقشق

مليا الفضا بالغنا .. آخر مرح فوق الغصون بتزقزق

عايزنى وحدى أعيش جنبك حزين و متنكد عليا ؟

أمال أسيب الشمس الجميلة على مين غيرنا راح تشرق ؟
اتقى ربك

مصطفى سلام

حب بالبسطرمة

حب بالبسطرمة

حلاوتك يا قلبى .. سقطت فى بحر الهوى غرقان

غرّقت فى طيشك يا قلبى .. كام واحدة من النسوان ؟

عجبى .. ما تعرف معنى العدالة إلا فى ضعفك

و آدى يوم و جالك يدوّقك مر الهوى ألوان

قاومت سلوى و نجوى و دوللى و سحر و إيمان

من بعد ما كنت صامد على الشاطئ بدون عنوان

داير بيشكى م الهوى ؟ .. يا شماته عدوينه

أنا قلت له إوعى تقع , واتاريه اتنيل على عينه

و اهو بكره يفرقه على روحه : بسطرمه و عيش فينو

عملتِ لى فلـّوطة و جريت ورا النسوان

طب دوق بقى يا بطل مرارة الحرمان

غروك بالحلاوة و المناظر و اللولى و المرجان

خلليك كده غرقان و متزفت .. و مسيرك اللومان

يا بنى الغضنفر إذا هوى هوى و أصبح قط

مطرح ما يرموه يترمى و جنب الحيطان ينحط

و لا يعرف فى بحر الهوى فين يكون الشط

و لا حتى يفرق فى الفرايس بين تيران أو بط


شوف إبن الملوح يا قلبى لما هوى ليلى

كان الهوى كارثة على دماغه و مليون بلوى

تفرقشى إن كانت حبيبتك هيه س أو ص

أهو كله نهايته البكا و المرار و الشكوى

كله مشاكل , إن قمت من حفرة تلقفك دحديرة

و فضيحة بجلاجل .. حتمشى ف طريقها .. ما تحكمك بنديرة

ما بلاش طريق الهوى , و تفضها سيرة

أصل المشاكل فى الهوى صعبة قوى كتيرة

إن حبتك شادية الحليوة , يا داهية طبلى و دقى

و تشنكلك نادية الجميلة , و دى ساكنة فى الدقى

تعرف يا قلبى ف يوم لو قلت لنهى رقـّى

حتطوحك يا قلبى العزيز ع الريسيكل بن

و انت يا عينى على شبابك يا حديث السن

ما قلت لك يا فؤادى المعذب : ابعد بعيد عنهن

ملقيتش فايدة من نصحى و إرشادى .. دا انت حاجة تجن

مصطفى سلام

عزيز قوم ذل

الأسد
من ورا القضبان
فى جنينة الحيوان
قال لى يا إنسان
ظلمت العبد لله الأسد
اللى الصمد
خلقه كمثلك حر

فى قلب أفريقيا
وسط الرعايا على عرش المملكة
و بدون فذلكة
هذا الأسير كان الملك

حتى أتى حكم القدر
على يد صياد آدمى مجرم خبيث
و بكل أسلوب واطى و خسيس
خدنى و حبسنى فى القفص

و قعدت أزأر و أزأر .. و لا هوه سامعنى
و سهرت ياما ليالى .. كرامتى بتوجعنى
أنوح و أبكى و غرقت فى دمعى
و مراتى عن بعد بتولول بيا لهوى و يا سبعى

و ولادى شبلين تركتهم أيتام
لو شفتهم حتقول سبحانه من أبدع
النار فى قلوبهم م الذل بتولع
شايفين أبوهم فى القفص منضام

عصبة رجال أقويا.. شالونى بلا رحمة
و معايا بعض الوحوش من آكلى اللحمة
حمـّـل معانا يا جدع .. هيلا هيلا هوب
و لا فرق بين ملك الوحوش ولا حتى أصغر كلب

رصونا فوق اللوارى .. و كلاكس .. و انطلقوا
وجابونا هنا ع الجيزة .. و الفرجة يا ولد ببريزة
و شوية عيال م المدارس جاية تتمهزأ
و بعد العز شوفوا الأسد .. قاعد بيتهزأ
ناقص يحلقوا لى لبدتى و يللا ارقصى يا عزيزة

يا ترى ياام العيال من بعدى : إيش حالك ؟
نسيتى ؟ ... و الا الليالى فى سواد حالك ؟
قومى ارفعى لى قضية فى الرفق بالحيوان
أرجع لعرشى متوج .. وأربى أشبالك

مصطفى سلام

الثقافة

الثقافة
(إلى د. فوزى أبو دنيا )
--------
الثقافة يا عم فوزى
و الأدب : واضح و رمزى
صرح شامخ سهدموه
فى زمان كانت منارة
هدها الفكر السفيه
الثقافة اليوم وظيفة
هابطة منحلة و سخيفة

فينها أيام طه حسين ؟
تلقى عقاد تانى منين ؟
و الحكيم و نجيب و غيرهم
دا زمان كان من سنين

أهل الثقافة ف يومنا عالة
عايشين على فكر الشوامخ
لا بحث تقرا و لا مقاله
م الهيافة .. صبحت دايخ

مصطفى سلام

 

 

هيـه كـده

!!! هيه كده

..هيه كده
..ماشيه كده
..تعدلها تعوج
..تعوجها تعدل
..تبقاشى عارف
..إيش فيها تعمل

..صعبان عليها
..إنى سعيد
..تلوى لى بوزها
..و تقوللى عود
..للبؤس ارجع
..تانى من جديد
..تقلب سعادتى
..آلام و غم
..تقدر تقوللى
..لو فيها حل
..إيش فيها أعمل
..قوللى يا عم
..اطلب رضاها
..ألقاه خيال
..و أَقـول تعالى

:تسخر , تقوللى
..لما تشوف
..حلمة ودانك
..و دا شئ محال
..أضحك تقوللى
..بطـّـل خبال
..ما بلاش هيافة و لعب العيال
..كشر و زمجر
..تبقى رصين
..حتقودنى حتما
..نحو الجنون

..يا خلق هووه
شوفوا لكو شوفه
..فى الدنيا ديـّه
..عملت لى طوفه
..خبطت نافوخى
..إغراء و زينة
..جايا تقوللى
..قوم يللا بينا
..هيـّه جميلة
..طعمه كمان
..لكن غرورة
..ملهاش أمان
..أجرى وراها
..ألقى سراب
..آخرتها إيه ؟
..حبة تراب

..يا للى اجتباكم
..رب الأنام
..بحجى و حكمة و حسن الكلام
..ألقاش لديكم
..رد لسؤال
..فى الدنيا ديّـه
..مرعوب و أخشى
..سوء المآل

..قالوا ابن آدم
..يجرى .. يبرطع
..ينزل و يطلع
..فوق السحاب
..و ما يملا عينه

.غير التراب

مصطفى سلام

البانجاتنترا
Panchatantra

يرجع كتاب كليلة و دمنة إلى أصول هندية سنسكريتية , لكن ابن المقفع حين قام بنقلها إلى العربية لم ينقلها عن أصولها السنسكريتية , و إنما عن ترجمة فارسية لها .. و هذه الأصول الهندية هى كتاب البانجاتنترا الذى يحتوى على حكايات ذات أهداف تعليمية سامية تتسم بطابع فلسفى أحيانا , و كانت هذه الحكايات معروفة لدى الهنود منذ خمسة آلاف سنة كما يقال
و يوحى البانجاتنترا أنه لم يوضع بواسطة فرد واحد و إنما بعدة أفراد , رغم أن مقدمته قد جاء بها وكلمة بانجاتنترا تعنى ( الكتب الخمسة ) , حيث Vishnu Sharm أن مؤلفه هو فيشنوشرما
يتألف من خمسة أبواب أو كتب
و الكتاب – البانجاتنترا - نظم شعرى و أبوابه – كما ذكرنا خمسة : خسارة الأصدقاء , اكتساب الأصدقاء , البوم و الغربان , خسارة الأرباح , فى العمل .. أرسل " كسرى أنوشروان " – الملك الفارسى – وزيره برزويه إلى الهند ليتزود بالثقافة الهندية , فعثر هناك على البانجاتنترا فنقل منه إلى اللغة الفارسية و أضاف إليه بضعة أبواب من حكايات هندية أخرى
و حين قام ابن المقفع بترجمته من الفارسية إلى العربية – تحت عنوان كليلة و دمنة – تصرف و غيّر و أضاف إلى أبوابه باب عرض الكتاب و باب الفحص فى أمر دمنة و باب مالك الحزين و البطة و باب الناسك و ضيفه و باب الحمامة و الثعلب و مالك الحزين
و يرى البعض أن ترجمة ابن المقفع – الفارسى المجوسى الذى أسلم ظاهرا – كان الهدف من ورائها بغضه للخلفاء المسلمين و نكاية فى ولاتهم و تنبيها لمظالمهم حيث أنه ينتمى إلى شعب قهره المسلمون و أخضعوه لسلطانهم

مصطفى سلام

الحوار بقرن الغزال

الحوار
بقرن الغزال

أخطأ الفنان فاروق حسنى أو أصاب .. لا بأس , و لكن البأس كل البأس فيما آلت إليه هذه ( المشكلة الفاروقية ) , لقد طـُرحت المسألة للجدل فشارك فيها كل من كانت لديه مقدرة على الكلام – مجرد الكلام الغالبية طالبت بإرسال فاروق حسنى إلى المقصلة , و القليل طالب بالتروى , و الندرة وقفت بجانب الفنان
ليست هذه هى المشكلة التى أود الإشارة إليها , فالمشكلة كما رأيتها أعمق من هذا بكثير : أننا لا نعرف كيف نتحاور .. لقد جلست مذهولا أمام ثلة من ( المثقفين ) على إحدى قنوات التليفزيون , فلم أجد فرقا بينهم – كمتجادلين – و بين عصبة من أبناء المناطق العشوائية : هؤلاء يتحاورون بالخناجر و قرون الغزال , و أولئك يتطاعنون بالكلمات
هل تذكرون مقالة فرعون فى قديم الزمان : " و ما أريكم إلا ما أرى " ؟ .. و كأن مثقفينا قد آمنوا بعمق بمقولة فرعون هذه , و أصبح كل لا يريد أن يرينا إلا ما يرى , و يعتدى على حق الآخر فى إبداء رأى معارض له أما عن الأستاذ فاروق حسنى , فلى رأى : إنه ابدى رأيا , كان المفروض أن يرد عليه بالرأى و القول الحسن , و أن يقارع الحجة بالحجة , و ألا يصب فوق رأسه كل تلك اللعنات , كان ينبغى أن نسأل أنفسنا : هل رأيه هذا رأى خاص أم رأى وزير ؟ , فإن كان رأيا خاصا فلابأس و ليناقـَش فيه , و إن كان رأى وزير فلنا أن نتساءل : هل أثر رأيه على عمله كوزير.. هل وضع رأيه هذا كسياسة لوزارته ؟ , فإن كانت الأخيرة وجب الحساب ,أما المطالبون بإقالته فأقول لهم اتقوا الله فى مساحة الحرية فى الرأى التى نالتها مصر بعد طول كفاح , لو حدث ما تنادون به , فقولوا سلام على حرية الرأى – بل الحرية كلها – فى مصر

مصطفى درويش سلام

Sallam,M.D.

 

 

ضلمة

ضلمة

..حبة عيال زى القرود متنططة

..نازلين فى بحر من الفلوس .. عايمين و آخر بلبطة

..و لا ّ الكليبات اللى هابطة مزفـتة و مرطرطة

..شوف البنات اللى مرقصينها : دلوعة حلوة مقطقطة

..و غلابة ياما فى الحياة متلطمة و متمرمطة

..تجرى ورا الأرزاق و ترمح , متبهدلة و متشحططة

..ناس فى هم تقوم و تصحى و ناس سعيدة مزقططة

.هل دى قسم ؟ .. لأ دى ضلمة فى القلوب متشعبطة

مصطفى سلام

جواز زنوبـة

جـواز زنـوبة

..زنوبة محمود عبد الصمد

..حبت ولد

..و الواد شاركها فى المحبة

..زود عليها فى الغرام و الحب حبة

..اسمه رجوبة .. يبقى دا اسم الدلع

..لكن حقيقى اسمه رجب

..ابن عم الشيخ حمد

..راجل كبير وسط رجالة البلد

..رأيه سديد و كلامه بينهم معتمد

..معجب بنفسه و قوته و صيت أبوه .. آخر عجب

..راحوا لابوها يطلبوها .. زغاريد و شربات انشرب

..وافق أبوها و امها .. قالوا دا واد عز الطلب

..يوم الجواز عملوا ولايم .. رقص و غنا و آخر طرب

..والواد و جنبه البت قاعدة , و الرصاص عم ينضرب

..و فرح و ساير فى البلد .. لكن مقدّر و انكتب

..خر الولد برصاصة طايشة ف قلبه و الدم انتشر

..طرطش على صدر العروسة و قلب زنوبة انكسر

..بدل الزغاريد قام العويل و صُـوات ملا كل الفضا

.راح الولد برصاص فرح , و على رجب حمّ القضا

مصطفى سلام

مجنون

مجنون

!!!!واحد مواطن – الله عليه – مجنون

ماشى بيضحك فى الشوارع على كل شكل و لون

لا همـّـه سوق مفترى و لا تاجر يغش زبون

و الثروة و اللى محتكرها واحد من المليون

مش مننا هُمـّـه .. دول من بلوتو هُمّـه أو نبتون
: هذا المواطن أنا قلت له يا عم
إيه بيضحكك و الدنيا هم و غم ؟

!!" سيبنى يا خالى فى حالى خللى عندك دم
: لو كنت عاقل تقوللى بذمتك إيه حصل أو تم

بعقولكو يا عاقل .. دا انا عندى الجنون أكرم
تبص تلقى عندنا : إن البلاوى كتار
جنبك فى فلسطين تلقى الدما أنهار
أما العراق : وِلـْعت فى ربوعه النار
و الغرب طايح فى المسلمين : قتل و خراب و دمار
و احنا – ياعينى – غرقانين فى الهيافة و الطبل و المزمار

لا جوّه لاقى فى حياتى متعة
الدنيا لا بتنظر إلىّ , و لا للفقير سامعة
ييجى وزير – مفروض يولع فى الضلام شمعة
يخلق مشكلة تشعلل فى النيران الوالعة
قال يعنى البلد ناقصة , نضيف للبدع بدعة

لو سبنا أرض العرب , و قصدنا العاِصمة كابول
: ما يتسمعشى غير صوت القنابل اللى نازلة تقول
يا ويلكم .. دوقوا بأسنا يا للى آمنتم بأحمد نبى و رسول
وحوش الأمريكان اللى ولوا على رأسهم غول
الإسم بوش , لكين الصفات : أحمق غبى مخبول

طب حوّد يا سيدى - قبل ما تيجى - على الشيشان
قتل الصقالبة من أهلها المسلمين .. قد إيه إنسان ؟
شباب و بيحارب عشان حقه , و عرضه و الأوطان
و المسلمين طنشوهم و كأنهم مش أهل للإيمان
و الغرب واقف بيتفرج .. شامتانين فى أمة القرآن

كل ده يا أيها العاقل وتستعجب ليه أنا مجنون ؟
طب دا انا اللى باستعجب : لسه فيه عاقل فى هذا الكون ؟
باين يا صاحبى إنى لوحدى العاقل .. سامحنى يا أخى .. باردون
سيبنى فى حالى و روح دوّرعلى مثلك :عاقل متزن و رزين
"أما أنا .. فبطلب من المولى القوة و الصبر الجميل و العون "

مصطفى سلام

فى سيدنا الحسين

فى سيدنا الحسين

دخلنا المقام

فى سيدنا الحسين
عليك السلام

يا سبط الأمين
يا عالى المقام
و م السابقين
يا نسل ( الإمام

و قاضى الزمان
فصيح اللسان

( و فارس مكين ) (1

سلامٌ عليك
على والديك

يا خيرة الشباب

شهيد لا يهاب
فتوة و دي

قرينا و قلنا

كلام مؤمنين
بكينا و دعينا

و قلنا أمين
ركعنا و سجدنا

و قلنا يا سيدنا
إذا ما التقيت

بجدك رسولنا
توصّـل إليه

صلاتنا و سلامنا
تقول له دا إحنا
شهدنا و أمَــنا
و مهما لقينا

و مهما اضُطهدنا
حنفضل دواما
من المسلمين

و قل له الشناءة
و طولة اللسان

دى طبعا بذاءة
من الأمريكان

و بابا حقود

و شيْطان مَـريد

رسم رسمتين

يكونوا الوقود

فى نار الجحيم

و فى يوم حييجى

حتملا ديانتك

جميع الأماكن

فى أوسلو و فيجى

و نلقى ضياءك

ملا العالمين
-------------------
(1) الإمام على بن أبى طالب كرم الله وجهه

مصطفى سلام