نماذج بشرية

نماذج بشرية

أ – إوعى الشيطان

عجبى على ابن آدم لما الشيطان يركبه ..

و على المفاسد كلها بيعلمه و ينشئه و يأدبه ..

و يسد قدامه طريق الخير و الحب و البركات ..

و كإنه ابنه اللى من صلبه فى الضلام أنجبه .

شوفوا الفتى لما يحط فى قلبه الهوى و الكبر و الجبروت ..

و يصور الدنيا لعقله المريض كإنه وحده صاحب الملكوت ..

ينسى انه فى يوم ح يترك الدنيا كلها و يرحل ..

يندم ساعتها و يتمنى لو كان تراب أو آخر طريقه الموت .

ب – نماذج سالبة

البنت حلوة بصحيح مقدرش أقول بـِـم ..

العين وسيعة و الشفايف كرزتين و الخفة جوه الدم ..

و خدودها وردى ، ما عندى كلام يوفى بديع الحسن ..

لولا الغرور : أقول لها : اتواضعى ، تقول لى روح اتكل يا عم .

و الواد دا فتوة و قوة خمسه سته حصان ...

واقف على النواصى يباصى للبنات بُقين غزل و لسان ..

قلت له يابنى دوّر لك على شغلانه تاكل من وراها عيش ..

قال لى يا عمى سيبنى فى حالى ، مش ناقصك انت كمان .

راجل مريض غرته السلطة ، قالوا لى دا ظابط شرطة ..

لو لم تقول له : يا باشا ، يخرّطك ميت خرطة ..

أو يحرقك بسبرتو كيف من فعل فى سيوة ..

أو يقتلك و يقولوا آسفين ، معلهشى دى كانت غلطة .

عامل فى مصنع قطاع تملكه الدولة ..

إهمال ، تكاسل ، تواكل ، تفكير عقيم أبله ..

لو خصخصوه ، يقعد و يبكى على الأيام ..

أرباح بتنصرف و الخساير على المصنع علاوله .

فلاح زهق م الزراعة و همها و بلاويها ..

مش لاقى كيماوى لزرعته و لا حتى الميه يرويها ..

أهمل فى رزقه و أكله و قوته و قوت أهله ..

أمراض كتيرة فى الزراعة ، مطلوب خبير جهبذ يداويها .

البيه موظف فى الحكومة منصبه عالى قوى و خطير ..

حاكم بأمره و حواليه شلة من الطراطير ..

بيسبحوا بحمده و توجيهاته و حكمته العالية ..

أول ما يرحل يكسروا وراه قله كبيرة و زير .

عالم كبير ذرى مستواه : إيه ون A 1

عمال يحصّل فى العلوم و المعارف ما كلـّـش و لا وَن ..

حطوه موظف فى مصلحة المجارى ( يحلحل الحلاحيل ) (1)..

فقد الأمل فى الحياة : قولوا لى دى مسئولية مَن ؟

عربية مرسيدس عيون ماشية بتتعاجب ..

جواها باشا بينظر للخلايق بالرمش و الحاجب ..

يفتح قزازها الملون و يرمى فى الطريق كيس شيبسى ..

و كإن الطريق مزبلة أو وقـْـف و ما لوش صاحب .

تاجر خضار أسعاره من بنات أطماعه ..

لو قلت له راعى الفقير ، يضرب على أسماعه (2) ..

راح فين ضميره يا ناس ، بسى قولوا لى ..

أخده لسوق الضلال و برخص التراب باعه .

و الشحط دا ماشى بيتمطع فى نهار رمضان ..

الصحة بغل وعفى ، لكن خسيس و جبان ..

سيجارة متدلدلة من بين شفايف حضرته ..

لا همه تقاليد و لا ناس و لا خوف من الديان .

ج - نماذج موجبة

مريت على منظر : الله عليه الله ..

واحدة بتصرخ ، تستغيث : الحقونى يا عباد الله ..

حبة ذئاب اتجمعوا و الشر فى عيونهم ..

شلة شباب اصطادوهم و فين يوجعك يا ديب .....

جمهور كبير اتجمعوا و بيهتفوا : الله يا شباب الله .

و دا شاب خلــّص دراسته وْ أخد ليسانس فى الآداب ..

قاعد بيبحث عن وظيفة : لقاها : كوسة و بظرميط و قلة فى الآداب ..

فكر .. واشترى توك توك و قال : ربى الكريم يغنينى ..

أكسب و أوفر و اشترى شقة ، و استكمل بقيت دينى ..

و لا حوجة لحكومة و لا أحلام و جرى خلف سراب .

ماشى فى يوم أتفسح على الكورنيش ..

منظر جميل و الناس كلها ماشية لكين بشويش ..

وقع المقدر و وقعت طفلة صغــّيرة فى النيل ..

نط بهدومه وراها و أنقذها : لا طلب أجرة و لا بقشيش .

البنت حلوة صحيح مقدرش أقول حاجة ..

قابلتْ عجوز عايزة تعدى ، و لعونها محتاجة ..

أخدت بإيدها و عدت فى سلام و أمان ..

" و الحمد لله ع السلامة يا ستنا الحاجة " .

واحد مُعلم واقف فى فصله و بيعلــّم ..

و كله هِمّة مراده ولاده فى العلوم تتقدم ..

شايف خلاص بلده من مشاكلها فى العلم و التعليم ..

آدى الضمير الحى ياخْوّانا .. يا سلام سلم .

راجل مرور واقف فى عز الشمس و الزحمة ..

السيارات و المشاه لخبطوا الدنيا بدون رحمة ..

لكنّ إصراره على التنظيم غالب على همومه ..

و مرتبه ف آخر الشهر، يدوب يجيب له جرام لحمة !

الجطر عم يچرى مجبّـل ع الصَعيد چوه ..

واحد متنقبة أتاها المخاض : لا حول و لاجوه ..

اتچمع الركاب يسألوا : إيش ايكون العمل مِعْها ..

اتنين أطبا : دا جبطى و دا مسلم تعاونوا على وضعها ..

فى شهامة و ِمرِوّة .

-------------------------------

عايز نماذج كمان ؟ : انظر شمال و يمين ..

تلقى العجب : الخير كتير و الشرجنبه مشين ..

لكن : لا تيأس : هيه كده الدنيا خلقها ربها ..

و خلق لنا قدرة اختيار : نبقى شمال ؟ و الا أهل يمين .

مصطفى سلام

14 سبتمبر 2007