الدنيا و ما فيها

الدنيا و ما فيها

مش عارف أعمل ايه فى الدنيا اللى أنا فيها ..

أعيشها زى ما هيه و لا ّ أجافيها ؟ ..

إن كنت أجافى تبان لى مفاتنها ..

و ان ملت ليها تظهر بلاويها .

لذيذه هيه و طعمة بدون فلسفة ..

لا تقول أرسطو قال و لا إخوان الصفا ..

تعقيدنا فيها خللى الجمال اختفى ..

عيشها كده تلقى الحنان و الدفا .

أسعد ما فيها كان أبونا اللى عاش فى الغابة ..

تفرقشى معاه إن كان هاتور أو بابه ..

ثمرة تقع له يلتهمها و يشكر ..

و الشرب مية ترميهاله سحابة ..

مبقولشى نعيش زى ما عاش جدك ..

الدنيا دى ما تعيششى فيها لوحدك ..

بس البساطة تبقى لك دستور ..

اسعى إليها و ابذل عليها جهدك .

مصطفى سلام

10 اكتوبر 2003

رباعيات أبى سلام

رباعــــــــيات

( أبو ســــــــــــلاّم )

أ ) تأمـــــــلات

* بعدين معاك يا زمن ؟ ليه بـسّى تناطحنى ..

أكون أسأت الأدب .. أرجوك تسامحنى ..

غلبان ما ليّـا غير لسان متبرّى من خشمى ..

تسمعشى غير جعجعة , و لا تشوف طحنى .

* فى الدنيا دى ناس , بالبهجة مليانة ..

و ناس كتير , فى الهم غرقانة ..

حتقول لى ليه ؟ .. رزق و قدر مقسوم ..

حكمة من ربنا , و الناس و لا دريانة .

* نجمة من السما بصت علىَ و قالت ..

إرضى ببختك يا بشر, و لو الحظوظ مالت ..

دا البخت قسمة و رب الكون قَـدَرها ...

و الأرض تحتك , يا ما حطت و ياما شالت .

* قعدت مرة أفكر فى الدنيا وتصاريفها ..

و قلت أسأل عليها , مين هـّوه عارفها ..

لقيته جاهل و محتار فى أمرها تايه ..

يقول لى عيش بالطريقة اللى انت شايفها .

* عجبى على ابن آدم , يجرى كتير و يبرطع ..

و يلملم الدنيا فى كفه , و فى خيرها بيتمتع ..

ناسى حقيقة ما تتنسيش أبدا ..

" عش كما تهوى , فى النهاية القبور تجمع " .

* يا قلبى يا جاحد مالك نسيت الخشوع ؟ ..

ربك حماك م المرض و النكد و الجوع ..

أعطاك من الدنيا حظك و بارك بالرضا فيه ..

أسرع يا قلبى دا النفير ضارب لنا نوبة رجوع .

* شوف النجوم فى السما .. مين اللى نجّمهــا ..

للشمس دارات و القمر .. مين اللى قسمها ؟ ..

و انت كمان يا بشر .. مين اللى سوى لك بنانك ؟ ..

إلحق و توب و اتعظ .. و النفس قـوّمهــا .

* لو إنك زرعت الأرض بالخير لوجه الله ..

مطلبتش ثواب من بشر أبدا يا عبد الله ..

و لا منظرة و لا فشخرة و لا أى شئ تانى ..

يبقى ثوابك مغفرة و رضا و حب الله .

* بتدب ليه بالقدم , على سطح البسيطة ؟ !

ماشى و لامم شلتك , عامل فى الطريق زيطة ..

دا اللى يغره شبابه يا فتى ..

أهبل و أفكاره عبيطة .

* أحب أصاحب كتير رجالة أو ستات ..

واود الكتير من غير لا خد و لا هات ..

لقيت حبايب كتير بادلونى حب بحب ..

و عرفت إن الجفا يملا القلوب آفات .

* سليم أنا و عفى و عال العال ..

و الحمد لله على ستره ف جميع الاحوال ..

غـّزتنى شوكة فى ضافرى ورّمـت صابعى ..

لقيتنى ضعيف , قليل الحيلة و قصير البال .

* فيه ناس كتير مايساووش فى سعرهم مليم ..

نمام و قاطع رحم , كداب و أصله لئيم ..

و اللى ينافق و يحقد , و القلب لونه غطيس ..

يتمنى المصايب لغيره , و يزول معاها النعيم .

ب) مصـــــــــــريات

* مصر اللى هيّــه من زمان , محروسة بالقرآن ..

أثنى عليها فى كتابه , ربنـا الرحمن ..

ييجى لنا مصرى من ولادها يلعن أبو خاشها ..

عينى على بلدى .. مبدأ حضارة الإنسان .

* صحيح البلد - أنا معاك - إنها منهوبة ..

من بعد ما بناها الجدود طوبة فوق طوبة ..

لكن يكون من ولادها جاحد و متنكر ..

تبقى البلد بولادها , ضايعة و منكوبة .

* يا جدى يا نارمر يا موحد القطرين ..

يا لابس التاج أبيض و أحمر , يا مرفوع الجبين ..

هات لى معاك خوفو و أحمس و العظيم رمسيس ..

و تعالوا حاكموا اللى شتم مصر يا أعظم الفراعين .

* مصر العظيمة اتشرفت , بأبونا ابراهيم ..

يوسف و يعقوب , و من بعدهم موسى الكليم ..

جاها المسيح فى حضن أمه للأمان ..

وصى عليها محمد ( أفضل صلا و تسليم ) .

* عد الجمايل عليك , مستحيل تحصيها ..

جسمك و روحك و عقلك , من صنعة أياديها ..

لمـا قويت , صبح العضل مفتول ..

أول عمل تعمله حضرتك , بالسهم ترميها ؟

* تغلط كتير فيها و بتسامحك , دى أم حنون ..

و ان غبت يوم عنها , يملا فؤادها حنين ..

و تقول شوفوا لى أولادى أينما كانوا ..

و تعود إليها تقابلك بحب و كمان حضنين .

* قــدّم يا مخطئ توبتك , و ابدى الندم ..

قبل ما ف يوم القيامة تزل بيك القدم ..

اللى بتعمله دا خطيئة و تغتفر ..

لو رحت لأمك تبوس إيديها و القدم .

* قلبى و روحى و دمى , عشان أراضيها ..

و أموت شهيد فى ترابها , لوإيـد مست أراضيها ..

خيرنا و نعيمنا و الأمل كله ..

دى حبنا و أمنا , بارك يا ربنا فيها .

ج) الهـــــــــــوى

* إن كنت أكره و أمقت .. أقولها بكل الفخر ..

و ان كنت احب .. أدارى الهوى فى السر ...

هـّوه الأساس فى الحياه : الحب و الا ّ الكـره ؟ ..

إعلن هواك يا فتى , دا الحب أعظم أمر .

* القلب لما انكوى ..

جالو الطبيب يداويه ..

قال له ملهشى سوى ..

غير الجمال يشفيه .

بصيت لقيت الدوا ..

شمس و قمر و نجوم ..

و الخضرة و شئ من الهوا ..

و الخير و نهر عظيم .

* بعثت قلبى العليل للطب يتداوى ..

أصله هوى قطة كلها حسن و شقاوة ..

قال الطبيب فؤادك فقدت الأمل منه ..

ما لوش دوا فى الأرض من موسكو إلى جاوا .

* ياللى على شط الهوى , متلـُـمش فيه غرقان ..

دا اللى ملهشى دوا , القلب لو ولهان ..

لما تدوق لوعته , يومها تبوح و تقول ..

ياريت فى بحر الهوى , أغرق كمان و كمان .

* الواد يحب البــنية و يقول لها روحى ..

أبكى على باب الهوى , و يطول عليه نوحى ..

و اللى يغنى للهوى : باكى و بيصَوت ..

كروان هوى دا ؟ .. و لا َ غراب نوحى ؟

* قالت لى زى القمر وشـّى .. قلت لها بلا خيبة ..

إيه فايدته الجمال يا قمر .. و الجهل بالويبـة ؟ ..

دا الحسن إن كان وش و قوام و خلاص ..

يبقى على صاحبته كارثة و ألف مصيبة .

* حبيت غزال شارد من الغزلان ..

لـُــعبى صحيح لكن جمال فتان ..

قلت له تعالى يا جميل نكمل بعضنا ...

قال لى واكون مسجون , و انت السيد السجان ؟

* القلب غنى لفرحته بحبيبته كام موال ..

يسمع حبيبه غنوته , ميـّـل علىّ و قال ..

إنت النصيب و الأمل , فى الجاى م الأيام ..

طار الفؤاد م الفرح و العقل جا له خبال .

* قاعد تغنى : هاتوا لى حبيبى , ما تروح يا أخى ليها ..

و تقول هاتوا له م الغورية هدية , ما تقوم تنقيها ..

هو انت اللى واقع فى الهوى و لا ّ مراسيلك ؟

كل اللى له حاجة يا صاحبى .. ما يقوم يلبيها .

* يا بنت يا سمرة ..إيه م الجمال فاتك ؟ ..

دا القد غصن البان و رمشك بالقلوب فاتك ..

قالت لى هـّوه الجمال , قد و رموش و عيون ؟ ..

دا الحسن جـّوه القلوب , و سيب الملك للمالك .

* إن شالله يكون عمرك رايح على الأفراح ..

و يكون نهارك عسل و الليالى ملاح ..

إيه الكتير اللى وقع و العمر لسه الفجر؟ ..

عيشى حياتك يا جميلة و سيبك من اللى راح .

* يا حلوة ياللى بتشتكى .. دى الدنيا حلوة كتير ..

بستان أريجه معتبر .. مليان ورود و زهور ..

و العمر خبرة و تجارب .. مش بالسنين محسوب ..

و الدنيا بتغدر ساعات .. لكن نعيمها وفير .

* الحسن فى الخلقة و الأخلاق ملك روحى ..

يللا على دنيا الجمال يا ملك ..... روحى ..

دى الدنيا حلوة و جميلة و كلها بهجة ..

ليه تكرهيها كده يا ملك روحى .

د) منوعـــــــــــــــات

* يا ريتنى ف طفولتى كنت الولد بلية ..

كنت النهارده بقيت أسطى , و راسى فى السما عالية ..

يخطب ودادى الجميع , و يقولوا يا دكتور ..

إيه كسبت من الوظيفة غير جيوب خالية ؟

* أنا قلت فـين النــــــــــتانة .. قالو لى فى الدانــــمارك

صحفى حمار و امــه أتانة .. ما يســــوى واحد مارك

ســــيدنا و ســيده الـــــنبى .. ناله بأحــــقر رســــــــم

بصـوا عليه يوم الديـــــانة .. فى النـار فى أسفل درك

* حاطط إيديْـه على خده و بيفكر .. ليه الكوارث دى ؟

عبـّارة تغـرق بألف شهيد أو أكثر .. و الأمر بيعدى ..

فين الحساب يا مصرى .. قول ربنا يخليك ..

يجوز الهم جوايا , يريّـح قلبى و يهدى .

عـّدى يومين و التالت .. كارثة فظيعة كتير ..

قالوا شوطة بتجرى , صابت جميع الطيور ..

يكونشى دا غضب من كتر معاصينا ؟

ناوية مرارتى تنفقع م الغيظ و م التفكير

فرخة من العشة , طلـّت علىّ و كاكت ..

ناوى تاكلنى .. و لا ّ عليا راحت ؟

إن كنت مش ناوى , حابسنى فى القفص ليه ؟

لا برد عندى و لا زكام , و لا أى شئ تالت .

* شعرك جميل يا لورد كازا ..

داريته ليه ؟ .. قو لى لماذا ..

إحساس و وجدان صافى و عميق ..

و صور كمان آخر لذاذة .

مصطفى سلام

من 22/2/2006

الألم و الشعر

ردا على

دكتور فوزى أبو دنيا

الألم للشعر وحى ..

لما يكوى قلب شاعر ..

يبقى شعره ملهشى زى ..

و آدى فوزى من جروحه ..

يشتكى آهين و أىْ ..

دكتور و مش قادر تداوى ..

قلبك المنصاب بـ كى ؟..

و الغلابة اللى احنا منهم ..

مين يداويهم يا خى ؟ .

مصطفى سلام

الأزهر و خلافه

الأزهر و خلافه

نادى المؤذن للصلا .. الله أكبر ..

على المآذن الاربعة للجامع الأزهر ..

دخلت اأدى الفريضة و قلبى بيقوللى ..

حتشوف ع اليمين المعز و ع الشمال جوهر ..

عشرة قرون م السنين حتعبرهم فى طرفة عين ..

حتمر ف كتاب التاريخ على أُمَرا , ملوك , سلاطين ..

خلفاء يقابلوك فى ساحته : من سنة و فطمييين .

صلى بنا الفريضة سِيدنا الإمام طنطاوى ..

و درْس بعد الصلا , و انا للعلوم دى غاوى ..

صلينا و دعينا ربنا يقبلنا فى الصالحين ..

و ينصر الإسلام بقدرته .. يا ربنا آمين .

رجليـّـا بعد الصلا , وزتنى أمشي فى الحوارى شوية ..

و المشى أصله دوا لعظامى و مفاصلى .. مية فى المية ..

من غير هدف أمشى شمال و يمين ..

عالم صنايعية كبار و محترفين .

لقيتنى طبيت فى حارة .. يا لطيف ألطف ..

ناسها يبصوا لك , يفرزوك , و الحالة كده تخوّف ..

" قلت لهم يا عالم قولوا لى الحتة دى إيه هيه .."

قالوا لى " يا محترم .. إنت وقعت فى الباطنية !!!!!!!"

" إيه اللى جايبك يا جدع هذ ُها الحتة ..

عدو ؟ نفرتك جتتك أربعتلاف حتة ..

نفرم لحمتك و نعمل من عظامك شوربة ..

و لا ّ حبيب ؟ .. نحضّر البوستة أو كام طربة ؟!!"

" اللعب ع المكشوف ؟ طب خبى بلوتك حبّــة .."

" دا الشغل فى حينا علنى و لا بنتخبى ."

مشيت و جنبى ماشى ولد عريف ..

أقولكو الحق ؟ ولد حِرِك جدا و دمه خفيف ..

" نتعرف و لك كل التحية و الضيافة و الإكرام "

" العبد اللى هوه أنا اسمى مصطفى سلام .."

" بالجودة يا عمى يابو درويش ..

إيه الطلب ؟ : أفيون و ماكس و لا ّ حشيش ؟ "

" الصنف اللى تلقاه عندنا : عالى .. و زيه مفيش .. "

" يا بْنى لا هذا و لا ده مطلبى .."

(( الواد دا باين عليه فاقد و مخه تقيل , غبى )) ..

كان الكلام أخد و عطا لسه ..

صفارة طويلة م الولد حلبسّـة ..

إيه الحكاية ؟ ..

مش مشكلة , جايه الحكومة تعمل علينا كبسه ..

يا نهار مقطرن !! رحت انا كده فاشوش ..

إجمد يا جدع , احنا رجالة ما بنخافوش ..

دا نهارنا كده مش باين له نهاية طيبة و لا لون ..

رجعت أجرى و ضلـّـم فى عنيا الكون ..

لا عمرى شفت الحشيش أبدا و لا الأفيون ..

رجليا بتخبط و قلبى بيرتعش .. مسكين ..

فتح لى باب , نزلت فى سرداب , طلعت على بره ..

حلفت مآجى هنا تانى .. توبة , أول و آخر مرة . (1)

رجعت أمشى من جديد , فى شارع الأزهر ..

قلب التجارة و الشطارة و التاريخ اللى بينور ..

إمشى و اتفرج و شوف الأصالة و التجارة و البشر ..

فين مين بنى ؟ .. راح ما خلـّـف وراه غير حسن الأثر ..

بيقول لنا التاريخ خدوا و اتعلموا منى العبر .

و وقفت مذهول أقول لعينى اتفرجى و دورى ..

قلبى انخطف : إيه دا يا سِيدنا ؟ .. دا جامع الغورى ..

شاد الشموخ و المهابة كلها قنصوه .. (2)

أثر يوازى فى الضخامة كل من سبقوه ..

الحق أقولهولكو ؟ .. طفرت دموعى من عينيا و سالت ..

" الله يلعنك يا سْـليم " .. دى دموعى دى اللى قالت ..(3)

يا للى نقلت الحضارة من بلدنا و سيبتها فى الضلام ترزح ..

يا رب ما تجعل مكانه فى الآخرة إلا الجحيم له مطرح ..

حـوّد ..... نحوّد .. " يعنى احنا ورانا إيه " ..

آدى الغورية .. كل اللى عايزه يا جميل تلاقيه ..

دى اللى تـَغنـّـى ف محاسنها من زمان قنديل ..(4)

حاجة لذيذة من زمان كان طِعِم قوى و جميل ..

" يا رايحين الغورية .. هاتوا لحبيبى هدية " ..

فيها الزحام و البشر و الدنيا و التاريخ ..

كل المراد تلقاه .. م الإبرة للصاروخ !!

عايز تشـّور عروسة ؟ و تجهز للجواز نفوسة ؟

م الخردوات و البافتة و التافته و الشيفتشى ..

و الألمونيومات و الإزاز و النحاس .. كل شي .

إمشى و شوف و ارفع للسما راسك تمللى ..

واوعى يفوتك تشوف بوابة المتولى ..

أو باب زويلة اللى اتشنق عليه طومان ..(5)

و ابتدت تكشر بعد شنقه , فى وشنا الأزمان ..

و تلاقى هناك جامع للمؤيد شيخ .. (6)

ادخل و صلى ركعتين فيه , و اذكر التاريخ ..

حوّد يا جدع ع اليمين و امشى فى تحت الربع ..

شوف صناعات النحاس و الصفيح .. أصلها هنا و النبع ..

فى نْهايته حتلقى مبنى .. إيه ده ؟ .. قـِف ْ , مَــــنْ ؟

يا امـّـــه !! .. حاسب يا جدع دى إدارة الأمن !!

-------------------------------------------------

(1) و الله ما حصل !!

(2) قانصوه الغورى الذى هزمه السلطان العثمانى سليم الأول فى موقعة مرج دابق سنة 1516

(3) سليم الأول الذى احتل مصر فى سنة 1517

(4) المطرب الشهير محمد قنديل – رحمة الله عليه – فى أغنيته " يا رايحين الغورية "

(5) طومان باى سلطان مصر بعد الغورى و الذى هزمه سليم الأول فى الريدانية سنة 1517

(6) المؤيد شيخ : السلطان المؤيد شيخ المحمودى تولى حكم مصر من سنة 1412 إلى 1421

مصطفى سلام

أجمل ليالينا

أجمل ليالينا

(رد على الأستاذ سيد عطية فى اجتماع أعضاء المنتدى فى عيد الأضحى 1427 هـ )

أجمل ليالينا , و كانت بالصفا رايقة و دفيانة ..

و سماها مزهزهة و بالنجوم الجلسة مزدانة ..

إخوان قلوبهم بالمودة و النقاء صافية و مليانة ..

و شباب و آباء كلهم ..

فى المنتدى ف أسمى مكانة ..

ستات و ذوق آخر أدب ..

آدى وردة منورة , و جنبها ريحانة ..

و اللى هنا يشعر و يزجل ..

و هناك مناقشة موسعة و بدون حصانة ..

و اللى اعتذر مقدرشى ييجى ..

منا السلام كان له أمانة ..

و الأخ سيد كان حقيقى ..

نور اجتماعنا و شمعدانـَـه