نماذج بشرية

نماذج بشرية

أ – إوعى الشيطان
..عجبى على ابن آدم لما الشيطان يركبه
..و على المفاسد كلها بيعلمه و ينشئه و يأدبه
..و يسد قدامه طريق الخير و الحب و البركات
.و كإنه ابنه اللى من صلبه فى الضلام أنجبه


..شوفوا الفتى لما يحط فى قلبه الهوى و الكبر و الجبروت

..و يصور الدنيا لعقله المريض كإنه وحده صاحب الملكوت
..ينسى انه فى يوم ح يترك الدنيا كلها و يرحل

.يندم ساعتها و يتمنى لو كان تراب أو آخر طريقه الموت.

ب – نماذج سالبة
..البنت حلوة بصحيح مقدرش أقول بـِـم
..العين وسيعة و الشفايف كرزتين و الخفة جوه الدم
..و خدودها وردى ، ما عندى كلام يوفى بديع الحسن

.لولا الغرور : أقول لها : اتواضعى ، تقول لى روح اتكل يا عم

..و الواد دا فتوة و قوة خمسه سته حصان

..واقف على النواصى يباصى للبنات بُقين غزل و لسان
..
..قلت له يابنى دوّر لك على شغلانه تاكل من وراها عيش

.قال لى يا عمى سيبنى فى حالى ، مش ناقصك انت كمان

..راجل مريض غرته السلطة
.. قالوا لى دا ظابط شرطة

.. لو لم تقول له : يا باشا ، يخرّطك ميت خرطة
..أو يحرقك بسبرتو كيف من فعل فى سيوة
.أو يقتلك و يقولوا آسفين ، معلهشى دى كانت غلطة

..عامل فى مصنع قطاع تملكه الدولة
..إهمال ، تكاسل ، تواكل ، تفكير عقيم أبله
..لو خصخصوه ، يقعد و يبكى على الأيام
.أرباح بتنصرف و خساير على مصنعه متداوله

..فلاح زهق م الزراعة و همها و بلاويها

..مش لاقى كيماوى لزرعته و لا حتى الميه ليرويها

..أهمل فى رزقه و أكله و قوته و قوت أهله ..
.أمراض كتيرة فى الزراعة ، مطلوب خبير جهبذ يداويها .

..البيه موظف فى الحكومة منصبه عالى قوى و خطير
..حاكم بأمره و حواليه شلة من الطراطير
..بيسبحوا بحمده و توجيهاته و حكمته العالية

.أول ما يرحل يكسروا وراه قله كبيرة و زير

A 1عالم كبير ذرى مستواه : إيه ون
..عمال يحصّل فى العلوم و المعارف ما كلــّـش و لا وَن

..(حطوه موظف فى مصلحة المجارى ( يحلحل الحلاحيل ) (1)
فقد الأمل فى الحياة : قولوا لى دى مسئولية مَن ؟

..عربية مرسيدس عيون ماشية بتتعاجب
..جواها باشا بينظر للخلايق بالرمش و الحاجب
..يفتح قزازها الملون و يرمى فى الطريق كيس شيبسى
.و كإن الطريق مزبلة أو وقـْـف و ما لوش صاحب

..تاجر خضار أسعاره من بنات أطماعه
(لو قلت له راعى الفقير ، يضرب على أسماعه (2
..راح فين ضميره يا ناس ، بسى قولوا لى
..أخده لسوق الضلال و برخص التراب باعه
..و الشحط دا ماشى بيتمطع فى نهار رمضان
..الصحة بغل وعفى ، لكن خسيس و جبان

..سيجارة متدلدلة من بين شفايف حضرته
.لا همه تقاليد و لا ناس و لا خوف من الديان

ج - نماذج موجبة
..مريت على منظر : الله عليه الله
..واحدة بتصرخ ، تستغيث : الحقونى يا عباد الله

.. حبة ذئاب اتجمعوا و الشر فى عيونهم
..شلة شباب اصطادوهم و فين يوجعك يا ديب

.جمهور كبير اتجمعوا و بيهتفوا : الله يا شباب الله

..و دا شاب خلــّص دراسته وْ أخد ليسانس فى الآداب

..قاعد بيبحث عن وظيفة : لقاها : كوسة و بظرميط و قلة فى الآداب
..فكر .. واشترى توك توك و قال : ربى الكريم يغنينى
..أكسب و أوفر و اشترى شقة ، و استكمل بقيت دينى
.و لا حوجة لحكومة و لا أحلام و جرى خلف سراب

..ماشى فى يوم أتفسح على الكورنيش

.. منظر جميل و الناس كلها ماشية لكين بشويش

..وقع المقدر و وقعت طفلة صغــّيرة فى النيل.

.نط بهدومه وراها و أنقذها : لا طلب أجرة و لا بقشيش

..البنت حلوة صحيح مقدرش أقول حاجة
..قابلتْ عجوز عايزة تعدى ، و لـْعُونها محتاجة
..
..أخدت بإيدها و عدت فى سلام و أمان

." و الحمد لله ع السلامة يا ستنا الحاجة "

..
..واحد مُعلم واقف فى فصله و بيعلــّم

..و كله هِمّة ، مراده ولاده فى العلوم تتقدم

..شايف خلاص بلده من مشاكلها فى العلم و التعليم
.آدى الضمير الحى ياخْوّانا .. يا سلام سلم

..راجل مرور واقف فى عز الشمس و الزحمة
..السيارات و المشاه لخبطوا الدنيا بدون رحمة
..لكنّ إصراره على التنظيم غالب على همومه
!و مرتبه ف آخر الشهر، يدوب يجيب له جرام لحمة

..الجطر عم يچرى مجبّـل ع الصَعيد چوه
..واحد متنقبة أتاها المخاض : لا حول و لاجوه
..اتچمع الركاب يسألوا : إيش ايكون العمل مِعْها
..اتنين أطبا : دا جبطى و دا مسلم تعاونوا على وضعها
. فى شهامة و ِمرِوّة
-------------------------------
..
..عايز نماذج كمان ؟ : انظر شمال و يمين

..تلقى العجب : الخير كتير و الشرجنبه مشين

لكن : لا تيأس : هيه كده الدنيا خلقها ربها

.و خلق لنا قدرة اختيار : نبقى شمال ؟ و الا أهل يمين
14 سبتمبر 2007

الفن الهادف

الفن الهادف

الله على الفن لما يكون هادف ..
ينقذنا من زمان الرقص و الهجص و الكلام الهايف ..
كل ما أحط عينى فى أى قسم من أقسامه ..
أرجع بنشوة فى قلبى .. و السبب إيه مش عارف ..
مش عارف إزاى يا أخى .. دا الفن هوه السبب ..
و الشكل و الذوق و أسلوب العرض و الجمال و الأدب ..
مبروك علينا منارة تنور دربنا المظلم ..
بالعلم و الفن و الأخلاق .. ربنا يبارك و يكرم ..
و يعين كل من أنشأ و أشرف و كانت لهم بصمة ..
أنا قلت أعدى و أبارك لهم ، و أهنى الكل و أسلم .

نوفمبر 2007

الحب قدر

الحب قدر


طعم الحياة ؟
هيه الحياة لسه باقيلها طعم ؟
..راح طعمها والريحة و الألوان
..حتى الضيا انسحب ما فضلشى غير ضلمة
..أما الجمال اللى كان : أصبح رمادى , عتمة
.و اتفرق القلبين , ما فيه دليل لهم و لا عنوان

..كنا فى صحبة اتسوّرت بالروْح و بالريْحان
..ضحك و مرح و سرور فى كل حين و أوان
..لكن فى ضميرنا سكن خوف من لعبة الأيام
..تجْمع , فننسى إن السعادة وهم م الأوهام
.. تقصر, تطول : نعم , لكن فى أوان معلوم
. لازم ح ييجى للفراق وقت و ميعاد محتوم

..قوللى يا صاحبى : مين الحياة ماشية حسب آماله ؟
..يجرى كجرى الوحوش ، غير رزقه اللى انكتب ما يناله
..قدره انكتب فى كتاب , فيه حظه ف دنيته و أحواله
..و ان كان فى رزقه حبيب يسعده : يا بخته , هنيا له
..وان كان انكتب له غير كده , يا ويله و سواد ليله
.يلقى الحياة كشرت و القمر غاب, و اتكسّرت قناديله


!!و ساعات .. يكون الفراق غباوة من العشاق
..العند يركب مخهم , و يطـّـفى لظى الأشواق
..." امشى يمين "... " لأ تعالى معايا كيف ما أشاء "
..و تقوم خناقة و فركشة , نتيجة تبدل الأهواء
.. ساعتها نلوم الحياة , و احنا اللى علينا اللوم
. شئ م التسامح يحل المشاكل و السعادة تدوم

8 يونية 2007

الحب و سنينه

قعدت أقول لقلبى قطيعة الحب و سنينه ..
ما فيه غشيم لطشه الهوى إلا اتلهى على عينه ..
قال لى تعالى نجرب ، ما فيش حاجة ح نخسرها ..
ماشى الكلام ، نجرب ، بس الحبيب المنتظريا قلبى الحبيب فينه ؟

مشينا : أنا و قلبى فى الطريق : هو يبص يمين ..
و عينى من وسط وشى تفط بتدور على الحلوين ..

البنت بيضه و حلوة و ماشية بتتعاجب ..
آخر رشاقة و دلال ، ماكياج تقيل ، مرسومة الحاجب ..
و الشعر هفهاف أُلعبان يرسى على اكتافها ..
بقى هيه ديا يا قلبى ؟ ..
لأ دى الميوعة تقيلة ، و دا أمر يتعايب .

طب بص : ..... دي سمرا ..
سحرها فى وشها و الشفايف حمرا ..
و البنطلون المحزق و البَدى و الدوكو و البودرة ..
و رموش صناعى بتدبح من أول النظرة ..
بقى هيه ديا يا قلبى ؟
لأ ، دى باين معمول لها عَمــرة .

طب بص اللى جاية من بعيد ، إوعى تقوللى شـى ْ ..
جايا بيسبقها بين إيديها شعاع المؤمنين من ضـى ..
متنقبة و نظارة ع العينين : راجل يا ترى دى أو ست ؟
روح جاك مصيبة يا قلبى ، مصيبة ما يكونليهاشى زى ْ.

و دى بنت متحجبة ، حلوة ، و ما تقولشى ..
غزالة متدندشة ، ياللا وراها نمشى ..
تكونشى فاكرنى يا قلبى عيل بدون أخلاق ؟ ..
أنا اغض عنها البصر و اقفل عينىّ و رمشى .

ماشيين بنتسكع ، أنا و قلبى ، مرينا على جامع ..
لمحنا خارج م الصلا قمر إنما إيه !!
هالة ضيا و نور من وشها طالع ..
بَص لى و ضحك – دا قلبى – و قال لى إيه رأيك ؟
أنا قلت سبحانه من صور ، دا النور بين إيديها ساطع .

لو كنا نعرف يا قلبى فى البداية : إيش يكون الحسن ..
وجْه و قوام ، حلاوة و الا شئ فى الذهن ..
صورة يبروزها أدب و يصونها الخلق و الأصل ..
أصل الأدب و الخلـُـق للجمال همّا الأساس و الحصن ..

ياللى انت طالب جمال .. فتش عليه فى الروح ..
إوعى تغرك مناظر يغيرها الزمان و تروح ..
ساعتها تندم ، ومن إمتى يفيد الندم ..
دور على النور اللى جوه ، و برضك بعض الجمال مسموح .

31 أكتوبر 2007

الحب و سنينه

.. قعدت أقول لقلبى قطيعة الحب و سنينه
.. ما فيه غشيم لطشه الهوى إلا اتلهى على عينه
.. قال لى تعالى نجرب ، ما فيش حاجة ح نخسرها
ماشى الكلام ، نجرب ، بس الحبيب المنتظريا قلبى الحبيب فينه ؟


..مشينا : أنا و قلبى فى الطريق : هو يبص يمين

..و عينى من وسط وشى تفط بتدور على الحلوين

..البنت بيضه و حلوة و ماشية بتتعاجب
..آخر رشاقة و دلال ، ماكياج تقيل ، مرسومة الحاجب
.. و الشعر هفهاف أُلعبان يرسى على اكتافها
..بقى هيه ديا يا قلبى ؟
.لأ دى الميوعة تقيلة ، و دا أمر يتعايب

.. طب بص : ..... دي سمرا
..سحرها فى وشها و الشفايف حمرا
..و البنطلون المحزق و البَدى و الدوكو و البودرة
..و رموش صناعى بتدبح من أول النظرة
بقى هيه ديا يا قلبى ؟
.لأ ، دى باين معمول لها عَمــرة

..طب بص اللى جاية من بعيد ، إوعى تقوللى شـى ْ
..جايا بيسبقها بين إيديها شعاع المؤمنين من ضـى
متنقبة و نظارة ع العينين : راجل يا ترى دى أو ست ؟
.روح جاك مصيبة يا قلبى ، مصيبة ما يكونليهاشى زى

..و دى بنت متحجبة ، حلوة ، و ما تقولشى
..غزالة متدندشة ، ياللا وراها نمشى
..تكونشى فاكرنى يا قلبى عيل بدون أخلاق ؟
.أنا اغض عنها البصر و اقفل عينىّ و رمشى

..ماشيين بنتسكع ، أنا و قلبى ، مرينا على جامع
!!!لمحنا خارج م الصلا قمر إنما إيه
..هالة ضيا و نور من وشها طالع
بَص لى و ضحك – دا قلبى – و قال لى إيه رأيك ؟
.أنا قلت سبحانه من صور ، دا النور بين إيديها ساطع

..لو كنا نعرف يا قلبى فى البداية : إيش يكون الحسن
..وجْه و قوام ، حلاوة و الا شئ فى الذهن
..صورة يبروزها أدب و يصونها الخلق و الأصل
.. أصل الأدب و الخلـُـق للجمال همّا الأساس و الحصن

..ياللى انت طالب جمال .. فتش عليه فى الروح
..إوعى تغرك مناظر يغيرها الزمان و تروح
.. ساعتها تندم ، ومن إمتى يفيد الندم
.دور على النور اللى جوه ، و برضك بعض الجمال مسموح

31 أكتوبر 2007

أين عمرى

أين عمرى ؟

قاعد بفكر فى الزمن ..

من بعد ما مرت سنين ..

وسنين سنين ، و سنين سنين ..

تركت أثرها ع الجبين ..

حبة خطوط ، تجاعيد ، غضون ..

و الشعر أصبح قطن أبيض ..

و الكرش يوم عن يوم بيعرض ..

و الخطاوى بعد ما كانت سريعة ..

أصبح العبء النهارده إنى أمشى ..

و الركب آلام فظيعة .


فينك يا شوقى و الشكاوى م المشيب ؟..

الشمس صارت مستعدة للمغيب ..

هوّه إمتى كان ميلادى ؟ ..

إمتى جيت للحياه دى ؟ ..

دا كإنى جيت بسى النهارده ..

و العمر يا دوبك ح يبدا ..


مر جرى ، كإنه ساعة أو دقايق ..

ما كنت فايق ..

دلوقتى بسى يا صاحبى أدركت الحقايق ..

عمرى ضاع ، فى كفاح ، فى صراع ..

كله رايح .. و اللى جاى أهو برضه رايح ..

نشقى و نكسب ، و اللى خسران و اللى رابح ..

نجرى و نجرى .. فى النهاية : كله رايح .


مصطفى سلام

20 يونية 2007

نماذج بشرية

نماذج بشرية

أ – إوعى الشيطان

عجبى على ابن آدم لما الشيطان يركبه ..

و على المفاسد كلها بيعلمه و ينشئه و يأدبه ..

و يسد قدامه طريق الخير و الحب و البركات ..

و كإنه ابنه اللى من صلبه فى الضلام أنجبه .

شوفوا الفتى لما يحط فى قلبه الهوى و الكبر و الجبروت ..

و يصور الدنيا لعقله المريض كإنه وحده صاحب الملكوت ..

ينسى انه فى يوم ح يترك الدنيا كلها و يرحل ..

يندم ساعتها و يتمنى لو كان تراب أو آخر طريقه الموت .

ب – نماذج سالبة

البنت حلوة بصحيح مقدرش أقول بـِـم ..

العين وسيعة و الشفايف كرزتين و الخفة جوه الدم ..

و خدودها وردى ، ما عندى كلام يوفى بديع الحسن ..

لولا الغرور : أقول لها : اتواضعى ، تقول لى روح اتكل يا عم .

و الواد دا فتوة و قوة خمسه سته حصان ...

واقف على النواصى يباصى للبنات بُقين غزل و لسان ..

قلت له يابنى دوّر لك على شغلانه تاكل من وراها عيش ..

قال لى يا عمى سيبنى فى حالى ، مش ناقصك انت كمان .

راجل مريض غرته السلطة ، قالوا لى دا ظابط شرطة ..

لو لم تقول له : يا باشا ، يخرّطك ميت خرطة ..

أو يحرقك بسبرتو كيف من فعل فى سيوة ..

أو يقتلك و يقولوا آسفين ، معلهشى دى كانت غلطة .

عامل فى مصنع قطاع تملكه الدولة ..

إهمال ، تكاسل ، تواكل ، تفكير عقيم أبله ..

لو خصخصوه ، يقعد و يبكى على الأيام ..

أرباح بتنصرف و الخساير على المصنع علاوله .

فلاح زهق م الزراعة و همها و بلاويها ..

مش لاقى كيماوى لزرعته و لا حتى الميه يرويها ..

أهمل فى رزقه و أكله و قوته و قوت أهله ..

أمراض كتيرة فى الزراعة ، مطلوب خبير جهبذ يداويها .

البيه موظف فى الحكومة منصبه عالى قوى و خطير ..

حاكم بأمره و حواليه شلة من الطراطير ..

بيسبحوا بحمده و توجيهاته و حكمته العالية ..

أول ما يرحل يكسروا وراه قله كبيرة و زير .

عالم كبير ذرى مستواه : إيه ون A 1

عمال يحصّل فى العلوم و المعارف ما كلـّـش و لا وَن ..

حطوه موظف فى مصلحة المجارى ( يحلحل الحلاحيل ) (1)..

فقد الأمل فى الحياة : قولوا لى دى مسئولية مَن ؟

عربية مرسيدس عيون ماشية بتتعاجب ..

جواها باشا بينظر للخلايق بالرمش و الحاجب ..

يفتح قزازها الملون و يرمى فى الطريق كيس شيبسى ..

و كإن الطريق مزبلة أو وقـْـف و ما لوش صاحب .

تاجر خضار أسعاره من بنات أطماعه ..

لو قلت له راعى الفقير ، يضرب على أسماعه (2) ..

راح فين ضميره يا ناس ، بسى قولوا لى ..

أخده لسوق الضلال و برخص التراب باعه .

و الشحط دا ماشى بيتمطع فى نهار رمضان ..

الصحة بغل وعفى ، لكن خسيس و جبان ..

سيجارة متدلدلة من بين شفايف حضرته ..

لا همه تقاليد و لا ناس و لا خوف من الديان .

ج - نماذج موجبة

مريت على منظر : الله عليه الله ..

واحدة بتصرخ ، تستغيث : الحقونى يا عباد الله ..

حبة ذئاب اتجمعوا و الشر فى عيونهم ..

شلة شباب اصطادوهم و فين يوجعك يا ديب .....

جمهور كبير اتجمعوا و بيهتفوا : الله يا شباب الله .

و دا شاب خلــّص دراسته وْ أخد ليسانس فى الآداب ..

قاعد بيبحث عن وظيفة : لقاها : كوسة و بظرميط و قلة فى الآداب ..

فكر .. واشترى توك توك و قال : ربى الكريم يغنينى ..

أكسب و أوفر و اشترى شقة ، و استكمل بقيت دينى ..

و لا حوجة لحكومة و لا أحلام و جرى خلف سراب .

ماشى فى يوم أتفسح على الكورنيش ..

منظر جميل و الناس كلها ماشية لكين بشويش ..

وقع المقدر و وقعت طفلة صغــّيرة فى النيل ..

نط بهدومه وراها و أنقذها : لا طلب أجرة و لا بقشيش .

البنت حلوة صحيح مقدرش أقول حاجة ..

قابلتْ عجوز عايزة تعدى ، و لعونها محتاجة ..

أخدت بإيدها و عدت فى سلام و أمان ..

" و الحمد لله ع السلامة يا ستنا الحاجة " .

واحد مُعلم واقف فى فصله و بيعلــّم ..

و كله هِمّة مراده ولاده فى العلوم تتقدم ..

شايف خلاص بلده من مشاكلها فى العلم و التعليم ..

آدى الضمير الحى ياخْوّانا .. يا سلام سلم .

راجل مرور واقف فى عز الشمس و الزحمة ..

السيارات و المشاه لخبطوا الدنيا بدون رحمة ..

لكنّ إصراره على التنظيم غالب على همومه ..

و مرتبه ف آخر الشهر، يدوب يجيب له جرام لحمة !

الجطر عم يچرى مجبّـل ع الصَعيد چوه ..

واحد متنقبة أتاها المخاض : لا حول و لاجوه ..

اتچمع الركاب يسألوا : إيش ايكون العمل مِعْها ..

اتنين أطبا : دا جبطى و دا مسلم تعاونوا على وضعها ..

فى شهامة و ِمرِوّة .

-------------------------------

عايز نماذج كمان ؟ : انظر شمال و يمين ..

تلقى العجب : الخير كتير و الشرجنبه مشين ..

لكن : لا تيأس : هيه كده الدنيا خلقها ربها ..

و خلق لنا قدرة اختيار : نبقى شمال ؟ و الا أهل يمين .

مصطفى سلام

14 سبتمبر 2007

الدنيا و ما فيها

الدنيا و ما فيها

مش عارف أعمل ايه فى الدنيا اللى أنا فيها ..

أعيشها زى ما هيه و لا ّ أجافيها ؟ ..

إن كنت أجافى تبان لى مفاتنها ..

و ان ملت ليها تظهر بلاويها .

لذيذه هيه و طعمة بدون فلسفة ..

لا تقول أرسطو قال و لا إخوان الصفا ..

تعقيدنا فيها خللى الجمال اختفى ..

عيشها كده تلقى الحنان و الدفا .

أسعد ما فيها كان أبونا اللى عاش فى الغابة ..

تفرقشى معاه إن كان هاتور أو بابه ..

ثمرة تقع له يلتهمها و يشكر ..

و الشرب مية ترميهاله سحابة ..

مبقولشى نعيش زى ما عاش جدك ..

الدنيا دى ما تعيششى فيها لوحدك ..

بس البساطة تبقى لك دستور ..

اسعى إليها و ابذل عليها جهدك .

مصطفى سلام

10 اكتوبر 2003

رباعيات أبى سلام

رباعــــــــيات

( أبو ســــــــــــلاّم )

أ ) تأمـــــــلات

* بعدين معاك يا زمن ؟ ليه بـسّى تناطحنى ..

أكون أسأت الأدب .. أرجوك تسامحنى ..

غلبان ما ليّـا غير لسان متبرّى من خشمى ..

تسمعشى غير جعجعة , و لا تشوف طحنى .

* فى الدنيا دى ناس , بالبهجة مليانة ..

و ناس كتير , فى الهم غرقانة ..

حتقول لى ليه ؟ .. رزق و قدر مقسوم ..

حكمة من ربنا , و الناس و لا دريانة .

* نجمة من السما بصت علىَ و قالت ..

إرضى ببختك يا بشر, و لو الحظوظ مالت ..

دا البخت قسمة و رب الكون قَـدَرها ...

و الأرض تحتك , يا ما حطت و ياما شالت .

* قعدت مرة أفكر فى الدنيا وتصاريفها ..

و قلت أسأل عليها , مين هـّوه عارفها ..

لقيته جاهل و محتار فى أمرها تايه ..

يقول لى عيش بالطريقة اللى انت شايفها .

* عجبى على ابن آدم , يجرى كتير و يبرطع ..

و يلملم الدنيا فى كفه , و فى خيرها بيتمتع ..

ناسى حقيقة ما تتنسيش أبدا ..

" عش كما تهوى , فى النهاية القبور تجمع " .

* يا قلبى يا جاحد مالك نسيت الخشوع ؟ ..

ربك حماك م المرض و النكد و الجوع ..

أعطاك من الدنيا حظك و بارك بالرضا فيه ..

أسرع يا قلبى دا النفير ضارب لنا نوبة رجوع .

* شوف النجوم فى السما .. مين اللى نجّمهــا ..

للشمس دارات و القمر .. مين اللى قسمها ؟ ..

و انت كمان يا بشر .. مين اللى سوى لك بنانك ؟ ..

إلحق و توب و اتعظ .. و النفس قـوّمهــا .

* لو إنك زرعت الأرض بالخير لوجه الله ..

مطلبتش ثواب من بشر أبدا يا عبد الله ..

و لا منظرة و لا فشخرة و لا أى شئ تانى ..

يبقى ثوابك مغفرة و رضا و حب الله .

* بتدب ليه بالقدم , على سطح البسيطة ؟ !

ماشى و لامم شلتك , عامل فى الطريق زيطة ..

دا اللى يغره شبابه يا فتى ..

أهبل و أفكاره عبيطة .

* أحب أصاحب كتير رجالة أو ستات ..

واود الكتير من غير لا خد و لا هات ..

لقيت حبايب كتير بادلونى حب بحب ..

و عرفت إن الجفا يملا القلوب آفات .

* سليم أنا و عفى و عال العال ..

و الحمد لله على ستره ف جميع الاحوال ..

غـّزتنى شوكة فى ضافرى ورّمـت صابعى ..

لقيتنى ضعيف , قليل الحيلة و قصير البال .

* فيه ناس كتير مايساووش فى سعرهم مليم ..

نمام و قاطع رحم , كداب و أصله لئيم ..

و اللى ينافق و يحقد , و القلب لونه غطيس ..

يتمنى المصايب لغيره , و يزول معاها النعيم .

ب) مصـــــــــــريات

* مصر اللى هيّــه من زمان , محروسة بالقرآن ..

أثنى عليها فى كتابه , ربنـا الرحمن ..

ييجى لنا مصرى من ولادها يلعن أبو خاشها ..

عينى على بلدى .. مبدأ حضارة الإنسان .

* صحيح البلد - أنا معاك - إنها منهوبة ..

من بعد ما بناها الجدود طوبة فوق طوبة ..

لكن يكون من ولادها جاحد و متنكر ..

تبقى البلد بولادها , ضايعة و منكوبة .

* يا جدى يا نارمر يا موحد القطرين ..

يا لابس التاج أبيض و أحمر , يا مرفوع الجبين ..

هات لى معاك خوفو و أحمس و العظيم رمسيس ..

و تعالوا حاكموا اللى شتم مصر يا أعظم الفراعين .

* مصر العظيمة اتشرفت , بأبونا ابراهيم ..

يوسف و يعقوب , و من بعدهم موسى الكليم ..

جاها المسيح فى حضن أمه للأمان ..

وصى عليها محمد ( أفضل صلا و تسليم ) .

* عد الجمايل عليك , مستحيل تحصيها ..

جسمك و روحك و عقلك , من صنعة أياديها ..

لمـا قويت , صبح العضل مفتول ..

أول عمل تعمله حضرتك , بالسهم ترميها ؟

* تغلط كتير فيها و بتسامحك , دى أم حنون ..

و ان غبت يوم عنها , يملا فؤادها حنين ..

و تقول شوفوا لى أولادى أينما كانوا ..

و تعود إليها تقابلك بحب و كمان حضنين .

* قــدّم يا مخطئ توبتك , و ابدى الندم ..

قبل ما ف يوم القيامة تزل بيك القدم ..

اللى بتعمله دا خطيئة و تغتفر ..

لو رحت لأمك تبوس إيديها و القدم .

* قلبى و روحى و دمى , عشان أراضيها ..

و أموت شهيد فى ترابها , لوإيـد مست أراضيها ..

خيرنا و نعيمنا و الأمل كله ..

دى حبنا و أمنا , بارك يا ربنا فيها .

ج) الهـــــــــــوى

* إن كنت أكره و أمقت .. أقولها بكل الفخر ..

و ان كنت احب .. أدارى الهوى فى السر ...

هـّوه الأساس فى الحياه : الحب و الا ّ الكـره ؟ ..

إعلن هواك يا فتى , دا الحب أعظم أمر .

* القلب لما انكوى ..

جالو الطبيب يداويه ..

قال له ملهشى سوى ..

غير الجمال يشفيه .

بصيت لقيت الدوا ..

شمس و قمر و نجوم ..

و الخضرة و شئ من الهوا ..

و الخير و نهر عظيم .

* بعثت قلبى العليل للطب يتداوى ..

أصله هوى قطة كلها حسن و شقاوة ..

قال الطبيب فؤادك فقدت الأمل منه ..

ما لوش دوا فى الأرض من موسكو إلى جاوا .

* ياللى على شط الهوى , متلـُـمش فيه غرقان ..

دا اللى ملهشى دوا , القلب لو ولهان ..

لما تدوق لوعته , يومها تبوح و تقول ..

ياريت فى بحر الهوى , أغرق كمان و كمان .

* الواد يحب البــنية و يقول لها روحى ..

أبكى على باب الهوى , و يطول عليه نوحى ..

و اللى يغنى للهوى : باكى و بيصَوت ..

كروان هوى دا ؟ .. و لا َ غراب نوحى ؟

* قالت لى زى القمر وشـّى .. قلت لها بلا خيبة ..

إيه فايدته الجمال يا قمر .. و الجهل بالويبـة ؟ ..

دا الحسن إن كان وش و قوام و خلاص ..

يبقى على صاحبته كارثة و ألف مصيبة .

* حبيت غزال شارد من الغزلان ..

لـُــعبى صحيح لكن جمال فتان ..

قلت له تعالى يا جميل نكمل بعضنا ...

قال لى واكون مسجون , و انت السيد السجان ؟

* القلب غنى لفرحته بحبيبته كام موال ..

يسمع حبيبه غنوته , ميـّـل علىّ و قال ..

إنت النصيب و الأمل , فى الجاى م الأيام ..

طار الفؤاد م الفرح و العقل جا له خبال .

* قاعد تغنى : هاتوا لى حبيبى , ما تروح يا أخى ليها ..

و تقول هاتوا له م الغورية هدية , ما تقوم تنقيها ..

هو انت اللى واقع فى الهوى و لا ّ مراسيلك ؟

كل اللى له حاجة يا صاحبى .. ما يقوم يلبيها .

* يا بنت يا سمرة ..إيه م الجمال فاتك ؟ ..

دا القد غصن البان و رمشك بالقلوب فاتك ..

قالت لى هـّوه الجمال , قد و رموش و عيون ؟ ..

دا الحسن جـّوه القلوب , و سيب الملك للمالك .

* إن شالله يكون عمرك رايح على الأفراح ..

و يكون نهارك عسل و الليالى ملاح ..

إيه الكتير اللى وقع و العمر لسه الفجر؟ ..

عيشى حياتك يا جميلة و سيبك من اللى راح .

* يا حلوة ياللى بتشتكى .. دى الدنيا حلوة كتير ..

بستان أريجه معتبر .. مليان ورود و زهور ..

و العمر خبرة و تجارب .. مش بالسنين محسوب ..

و الدنيا بتغدر ساعات .. لكن نعيمها وفير .

* الحسن فى الخلقة و الأخلاق ملك روحى ..

يللا على دنيا الجمال يا ملك ..... روحى ..

دى الدنيا حلوة و جميلة و كلها بهجة ..

ليه تكرهيها كده يا ملك روحى .

د) منوعـــــــــــــــات

* يا ريتنى ف طفولتى كنت الولد بلية ..

كنت النهارده بقيت أسطى , و راسى فى السما عالية ..

يخطب ودادى الجميع , و يقولوا يا دكتور ..

إيه كسبت من الوظيفة غير جيوب خالية ؟

* أنا قلت فـين النــــــــــتانة .. قالو لى فى الدانــــمارك

صحفى حمار و امــه أتانة .. ما يســــوى واحد مارك

ســــيدنا و ســيده الـــــنبى .. ناله بأحــــقر رســــــــم

بصـوا عليه يوم الديـــــانة .. فى النـار فى أسفل درك

* حاطط إيديْـه على خده و بيفكر .. ليه الكوارث دى ؟

عبـّارة تغـرق بألف شهيد أو أكثر .. و الأمر بيعدى ..

فين الحساب يا مصرى .. قول ربنا يخليك ..

يجوز الهم جوايا , يريّـح قلبى و يهدى .

عـّدى يومين و التالت .. كارثة فظيعة كتير ..

قالوا شوطة بتجرى , صابت جميع الطيور ..

يكونشى دا غضب من كتر معاصينا ؟

ناوية مرارتى تنفقع م الغيظ و م التفكير

فرخة من العشة , طلـّت علىّ و كاكت ..

ناوى تاكلنى .. و لا ّ عليا راحت ؟

إن كنت مش ناوى , حابسنى فى القفص ليه ؟

لا برد عندى و لا زكام , و لا أى شئ تالت .

* شعرك جميل يا لورد كازا ..

داريته ليه ؟ .. قو لى لماذا ..

إحساس و وجدان صافى و عميق ..

و صور كمان آخر لذاذة .

مصطفى سلام

من 22/2/2006